ORANJESTAD, Aruba – Riu Palace Aruba tin un empleado cu ta trahando cu nan pa 13 aña, pero ta trahando mas di 30 aña den e edificio actual. Ale de Cuba, Assistant Maître D na Don Nicolas Restaurant, ta trahando cu e restaurant pa 12 aña y algun luna, pero a traha cu nan desde momento cu Riu Palace a cumpra Aruba Grand y a renoba e hotel.
Ale de Cuba tabata e homber di confiansa di e doño y e manager di proyecto Sr. Sanchez. Aki el a traha 1 aña y 4 luna como e homber di confiansa. Trahando mas di 30 aña den e mesun edificio ta un experencia hopi grandi. El a cuminsa traha den e edificio aki dia 3 di Juni 1981 cu Shereton Hotel. El a sigui traha cu nan te ora cu a bende e hotel y a bira Aruba Grand Hotel, despues Aruba Palm Beach Hotel y te ora cu Riu Palace a cumpr’e.
Pa su persona e ta un experencia hopi grandi door cu el a pasa 4 decada di hotel. Un experencia actual cu e tin di RIU ta e trato bon cu nan ta ricibiendo. Nan tin fiesta di empleado, ora di haci aña ta haya dia liber y cu pago. Tambe tin e sistema di papeleta cu ta sali cada 4 siman y si esaki sali bon, ta brinda y anochi tur empleado mag bay come den restaurant, tambe ta cubri diferente beneficio pa trahado, manera dentista gratis pa e empleado, su casa y yiunan.
A haci diferente cambio riba e edificio y Ale de Cuba ta haya cu el a keda hopi bunita. Bishitantenan ta hopi contento, specialmente esunnan cu ta bin bek pa 38 aña. Pa Ale de Cuba tin 38 aña trahando den sector hotelero y su hefe e tempo ey, Jan Lacle, a siñ’e hopi cos. El a bis’e semper cu mester gusta loke bo ta haci y Ale de Cuba a hinca den su cabes cu e gusta loke e ta haci. P’esey awe e tin 38 aña den e mesun hotel trahando cu amor y dedicacion.
