Diadomingo dia 16 di juni nos lo ta celebrando dia di Tata. Pero kiko esaki significa?
E ta un dia cu nos ta duna nos gratitut y demostra nos aprecio na e persona masculino cu a juda forma nos den ken nos ta. Dicon mi ta bisa esaki? Na Aruba nos ta wak durante ultimo decadanan cu hopi mama ta jena e rol di e tata. E mama ta esun cu ta percura pa nan yuinan sin tin un tata den cas o den nan bida. Na Aruba tin hopi famia o muchanan cu no ni conoce ken nan tata ta, mientras cu e mama tin cu lucha dia y anochi pa asina por ofrece e mucha un mihor bida.
Na otro banda nos ta wak tambe, tatanan soltero cu ta bringa pa nan derechonan como tata. Especialmente esnan cu e reconoce (duna erkenning) na e mucha y despues di tempo ora cu e relashon a kibra e mama ta tuma un tipo di represaya contra e tata door di no laga e tata wak e mucha o pasa tempo cune debidamente. Lamentablemente akin aki na Aruba e ta un caminda di cruz cu un tata mester cana pa logra jega na wak y pa por tin un omgang cu su propio yuinan.
E rol di un tata den bida di su yuinan ta di sumamente importante pa juda duna guia y ser un bon ehempel pa e mucha. Stimula e mucha den actividad sano, duna carino y amor na e mucha, demostra di tin e interes di e muchanan na halto paso manjan nan ta nos futuro cu lo mester juda hiba e pais aki pa dilanti.
Pa es motibo aki mi kier a duna un danki na tur e tatanan, welonan y omonan cu sigur ta demostra e ehempel y dunando apoyo na nos muchanan. Cu cada uno di boso por tin un dia agradabel den seno familiar.
Alavez mi kier a gradici y duna forsa na e mamanan cu ta fungi tambe den e rol di un tata pa un of otro motibo, pa nan por pasa un felis dia………
