Hulanda recientemente a informa cu lo pone 23.8 miyon Euro disponibel e aña aki pa atende cu e impacto di e crisis di Venezuela riba nos pais. Prome Minister a enfatisa cu e 23.8 miyon Euro aki, Aruba lo no ricibi como placa. Hulanda ta cuantifica den kico nan ta bay yuda Aruba y Corsou cu e placa disponibel aki. P’esey Gobierno ta trahando riba e lista mas structural di locual mas nos tin mester pa inclui den e lista aki pa Hulanda yuda nos cu ne.
Gobierno di Aruba ta den e proceso pa entrega e lista di loke cu tin mester pa haci Aruba mas sigur. Entre otro mas radar, mas proteccion y vigilancia di nos costanan, mas boto pa controla nos costanan mas miho, mas asistencia na e procesonan di peticionnan di asilo.
“Entre otro, nos mester mas boto pa Kustwacht, mas hende pa traha y cubri mas ora. Na IND cu ta yuda cu e procesonan di asilo, e cantidad di oranan cu ta wordo poni den e trabou aki, por tambe wordo cubri cu e placa. Necesidadnan di urgencia ora hende bati na porta pa asistencia, tambe por wordo introduci den e lista. Gobierno ta pensando tambe riba e efecto cu e impacto tin riba enseñansa, salubridad (vacuna), husticia (extende capacidad di detencion)”.
Prome Minister a indica cu esaki, cu e 23.8 miyon Euro lo no wordo parti na mita entre Aruba y Corsou. Tampoco e placa aki lo ta disponibel pa crea vivienda y otro cosnan asina pa e personanan cu ta bin haci peticion di asilo. E placa aki ta bay pa fortifica Aruba como pais den haci Aruba mas sigur pa asina atende cu e crisis miho posibel.
Gobierno ta den deliberacion cu Hulanda pa caba di yena e lista cu diferente rekisito cu a wordo pedi. Esaki ta tumando hopi tempo pero e departamento encarga cu esaki ta haciendo tur esfuerso, trahando hasta den fin di siman pa asina a entrega e prome lista na Hulanda.
Pronto un delagacion di Organization for American States (OAS) lo ta di bishita na Aruba pa un presentacion di e impacto di e crisis di Venezuela. OAS lo tin un session plenaria fin di luna na Colombia caminda cu nan lo presenta e impacto di e crisis. Danki na e conbersacionnan luna pasa na Washington di Prome Minister cu e secratario general di OAS, señor Almagro, tanto Aruba y Corsou a wordo inclui den e presentacion aki na Colombia.
“Nos ta mira cu speransa cu esaki lo yuda tambe trece comprension pa e situacion di Aruba y ohala cu por yuda tambe cu fondoE situacion di Venezuela ta keda un situacion dificil. E impacto riba nos pais ta grandi. Mi no ta mira un resolucion pronto”, Prome Minister a duna di conoce.