131
ORANJESTAD – Diabierna anochi cu hopi honor y placer Minister Ruiz-Maduro a entrega un reconocemento na sr. Eddie Leonardo ‘Jan Poets’ Peterson pa su gran aporte na cultura di Aruba riba e tarima local y internacional.
Via Jan Poets nos a haya como Pueblo hopi informacion di deporte y farandula local y internacional y Jan Poets a percura semper pa brinda un bunita sosten y cobertura na nos Reinanan cu a participa den eleccionnan di beyesa rond di Mundo. Jan Poets a laga Mundo tambe sera conoci cu Aruba unda cu ela bay. Via su programanan PoetsTV y Nos Baluartenan y via su rubrica Den Ambiente den matutino Diario, Jan Poets a brinda informacion di nos Arubianonan y tambe Yiu di Corsow cu ta briya na cas y den exterior.
Cu hopi determinacion, perseverancia, aventura, humor den su hari special y cu hopi FE, Jan Poets a sa di conberti su mes den un cuidadano cu atraves di su trabou ta representa Aruba dignamente. ‘Danki Jan Poets pa tur bo esfuersonan y pabien cu un bunita reconocemento,’ ta e deseo expresa pa Minister Ruiz-Maduro na momento di entrega di e reconocemento bon mereci na Jan Poets.
