Home » Nan ta sigui drenta, scondi den oranan di marduga, ” No Tiene Limite”

Nan ta sigui drenta, scondi den oranan di marduga, ” No Tiene Limite”

by Admin
0 comment 79 views

Boto ” NO TIENE LIMITE” cu dos motor laga atras na un Boca un poco pariba di Bushiribana

Bushiribana: Diadomingo algo pasa di 6’or di mainta un piscado cu ta pisca na e parti panort di Aruba, ta topa cu un boto riba tera cu dos motor na dje. E boto ta un tipo Peñero, esaki tabata procedente di Venezuela y e nomber di e boto “NO TIENE LIMITE” cu ta pas cu locual ta sosiendo, negoshi di transportacionnan di personanan ilegal for di Venezuela pa Aruba ta sigui florece.

Mas ilegal a bolbe drenta Aruba
E boto aki a drenta na e boca poco pariba di Bushiribana, e orario ta desconoci, pero si mester ta den oranan di anochi pa mainta hopi trempan. No ta prome biaha cu ilegalnan of esnan cu ta tene nan mes ocupa cu traficacion di hende ta pone nan bida y di otro den peliger, drentando na e parti panort di nos isla.

E botonan cu ta drenta na e parti panort di Aruba
Cu botonan tabata drenta na e parti panort di Aruba, no ta di awo, ta di semper, antes esnan cu tabata den traficacion di droga tabata usa costa norte pa drenta cu droga, despues cu a cuminsa cu hopi control na e parti pazuid y tambe cu hendenan a cuminsa bira mas atento pa e entrada di ilegalnan na e costa pazuid, e botonan a cuminsa usa e parti panorte di nos isla pa baha of drenta nos isla no solamente cu droga of arma pero tambe cu persona indocumenta y mas cosnan contra ley.

Kustsurveillance
Segun e piscado, ela topa cu e boto, pero no a topa cu niun hende of cu cualke otro mercancia ilegal eynan, por bisa cu e boto lo mester por tin basta ora riba tera caba. Esaki sin cu e helicopter of kustsurveillance a pasa eybanda y cu ta te den oranan di mainta e piscado a bin topa cu e boto y a avisa autoridad.

Algo cu ta wordo comenta ultimamente masha hopi mesta , cu ta topa e Jeepnan di Kustsurveillance, na varios accident of ta bay atende cu otro incidentenan cu no ta nan trabou e momento ey y ta leu for di costa, enbes di ta patruyando na costa, lagando e casonan aki pa straatdienst.

Control tin, pero ainda falta mas
Enberdad tin control pero no tin suficiente, paso ainda ilegalnan ta sigui drenta y no ta drenta solamente hende ilegal pero ta trece droga, arma, bestianan prohibi. Algun tempo atras nan a drenta pariba di Kapel di Alto Vista y durante dia a bin topa nan scondi den mondi, un di e ilegalnan tabata tin handgranaat cune, pa Kiko of pa Ken ela trece? No ta conoci. Danki Dios cu e persona aki a wordo gara y e handgranaatnan confisca.

Habitantenan mester pone extra atencion awe
Awe durante dia lo ta bon pa e habitantenan di Ayo, Rooi Prikichi, Marawiel, Koeriboeri etc. ta hopi mas atento y si acaso mira cualke persona desconoci ta circula den nan becindario tuma contacto cu di biaha cu polis, paso no ta conoci si e ilegalnan aki a bay for di ey banda caba of nan por ta ainda nan ta scondi den mondi eybanda. Semper lo ta bon pa avisa autoridad mesora si mira algun movecion straño eybanda, paso e personanan aki por ta arma, por tin droga of cualke mercancia prohibi den nan poder y asina hunto protega nos isla.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio