ORANJESTAD – Taskforce di Reino encarga cu Derecho di Mucha por mira bek riba un conferencia exitoso titula ‘Ready. Set. Protect.’.
Durante e conferencia aki tur 4 pais y tur 3 entidad publico di Reino a haya oportunidad pa intercambia cu otro, plania y haci palabracionnan tocante puntonan importante, cu lo conduci na resultadonan tangibel riba tereno di proteccion di mucha.
Tabatin diferente charla sumamente valioso y mescos tambe tayer interactivo. E profesionalnan di e seis islanan di Reino den Caribe cu a participa na e conferencia a keda impresiona. Mientras cu indudablemente tin mucho mas pa alcansa, tur isla ta trahando di forma diligente pa construi un cadena di proteccion fuerte pa mucha. E oportunidad pa sigui fortifica colaboracion entre e islanan y Hulanda tabata sin mas un nota positivo durante e conferencia, considerando cu colaboracion a keda proba di ta un condicion imperativo pa por alcansa resultadonan duradero.
Corsou y Sint Maarten lo colabora den preparacion di cada un su respectivo proceso pa raporta maltrato di mucha y maltrato domestico (e asina yama ‘meldcode’ na Hulandes). Aruba ta ehecutando un plan di crisis social. Cu ta enfoca entre otro riba prevencion. Boneiro ya caba ta implementando ‘safetynets’, pa garantisa cu muchanan tin e opcion pa participa na actividadnan despues di scol. E concepto aki ta conoci como uno sumamente efectivo. Saba a introduci e metodo ‘HighScope’, den un esfuerso pa mehora educacion preescolar. Sint Eustatius ta preparando pa lansamento di un liña di telefon pa mucha. Alabes nan ta den preparacion pa lansa un centro pa raporta maltrato di mucha y violencia domestico. Esaki ta djis algun ehempel di e iniciativanan cu e islanan ta ehecutando pa ofrece nos muchanan un miho futuro.
Ta existi e idea eroneo cu muchanan ta maltrata solamente ora dal, grita of abusa di nan sexualmente. E realidad ta sin embargo cu e forma mas comun di maltrato ta negligencia, tanto fisico como emocional. E echo cu no semper ta reconoce of detect’e tin cu haber cu e hecho cu e ta un tipo di abuso pasivo. Esaki ta tambe e motibo dicon Taskforce ta pone enfasis riba prevencion. Prevencion ta un di e areanan di atencion den e MoU cu tur pais y entidad publico di Reino Hulandes a firma november aña pasa, conmemorando Dia Internacional di Derecho di Mucha.
Taskforce di Reino encarga cu Derecho di Mucha a keda estableci na 2014 durante e conferencia di reino cu a tuma luga na Aruba, pa promove colaboracion y desaroyo di conocemento y experencia riba tereno di Derecho di Mucha, entre otro. ‘Ready. Set. Protect.’, tabata e di cuater conferencia consecutivo.
Pa mas informacion, por fabor tuma contacto cu Sacha Geerman na Departamento di Asunto Social, telefon: 528-1182.
Descripcion di e miembronan di Taskforce:
Di robes pa drechi ariba: Soraya Agard (Sint Maarten), YvonneBermudes (Aruba), Sacha Geerman (Aruba), Miosotis Yearwood (Corsou), Peggy Grootens (Corsou), Shermina Powell-Richardson (Sint Maarten).
Di robes pa drechi abou: Job Tanis (Hulanda, Ministerio di Salubridad Publico, Bienestar y Deporte), Dirkje de Jong (Sint Eustatius), Christopher Frans (Boneiro), Rachel Crowe (Hulanda, Ministerio di Asuntonan Interior y Relacionnan den Reino), Krijn Pons (Saba).
