Fundacion Sea Bunita Sea Bo Mes ta continua y ta sigui presenta su modelonan cu lo desfila ariba tapijt cora y tambe ariba pasarela dia 8 di juni proximo den e prestigioso Renaissance Convention Center durante e Sea Bunita Sea Bo Mes fashion show di nos adultonan, muchanan y hobennan special.
Nos siguiente modelonan cu ta cla pa desfila ta Gisella Thijsen, Saray Alvarez, Stacey De Veer y Alexandra Erlin Carona, adultonan, muchanan y hobennan super inteligente cu bendicion special, cu lo wordo acompaña door di nos celebridadnan di Aruba cu semper ta cla pa duna tur nan sosten pa cu nos muchanan y hobennan special y acompaña nan ariba e pasarela den Renaissance Convention Center dia 8 di juni proximo.
Fundacion Sea Bunita Sea Bo Mes, ta gradici cada un di e patrocinadornan, boutiquenan di moda cu ta participando y a yuda cu e vestuario di nos muchanan y hobennan special pa diasabra awor.
Un anochi cu ta bay bira grandi un biaha mas, esaki pa di 4 aña cu Fundacion Sea Bunita Sea Bo Mes ta organisando e anochi bunita aki. Lo bay tin hopi sorpresa durante e anochi aki combina cu canto, baile, declamacion di poesia y e famoso pasarela unda nos por bay aprecia e talento di nos muchanan y hobennan special.
Cumpra bo carchi na balor di awg 35,– cual ta obtenibel cerca tur mayor di nos muchanan y hobennan special. Pa mas informacion por tuma contacto cu sra. Marienela Geerman na cel # 733-1431. No perde e grandioso show aki cu ta wordo prepara cu hopi amor, cariño y sumamente special.
Aruba ban duna tur nos apoyo y brinda nos adultonan, muchanan y hobennan special tur nos sosten den nan lucha pa inclusion.
