Durante disertacion di Alan Howell di Fraccion di POR den Parlamento durante tratamento di cambio di ley di CAFT, el a dicidi di papia cu un lenguahe pa tur hende por compronde. “Palabra bunita y palabra tecnico no ta yuda cu nada, mester laga pueblo compronde pakico ta akiden y pakico nan ta experiensa ciertonan cambionan economico, cambionan den finansas y tambe cierto dolornan unda cu pueblo ta expresa cu cosnan a bira caro”.
Papiando cla y raspa el a bisa cu CAFT a bin Aruba pasobra e maneho tabata fatal y ora algo ta fatal, supervision ta bin. Howell no a laga afor e parti cu e tambe tabata forma parti di AVP e tempo ey, pero a splica bon cla cu den e posicion cu e tabatin e no por a haci nada. Pero mirando kico tur tabata pasando el a tuma e decision di cambia di team y awo ta forma parti di POR cu conhuntamente cu coalicion ta trahando pa hiba Aruba riba e rumbo cu en berdad mester bay. E ta reconoce cu e team di cual e tabata forma parti di dje tabata fatal y pueblo mes a strafnan y awe nan ta sinta na banda di oposcion.
El a sigui bisa cu si gobernacion anterior lo a goberna drechi, nos no lo ta den e situacion unda cu Hulanda a pone presion pa bin supervisa y asina evita cu e cosnan a sali for di sla. “Draai rond, balia baile di sinta y hunga wise guy a pone nos pais den e situacion den cual nos ta awe.
Mi no ta pro CAFT at all, pero nan ta paden caba y a laganan drenta na nan kier, na nan antoho. Awo coalicion a haye cune y como Parlamento responsabel ta bay cambia cierto articulonan cu ta bay contra nos constitucion. No por acepta cu nan ta riba Parlamento. Mi por acepta CAFT como consehero, pero hamas mi lo acepta cu CAFT ta baas den nos mesun cas, nos mester keda baas den nos cas. Akiden ta Parlamento ta dicidi, esun cu no gusta bay fliet”, Alan Howell a bisa enfaticamente.
Na e parti final di su disertacion, Howell a pidi ministernan pa traha riba e mision y vision cu e gobierno tin pa tin un miho Aruba, pa goberna drechi cu transparencia y integridad pa asina Aruba por tin su propio organo di supervision. “Nos no mester di ningun hende di afor bin wak pa nos, nos mes tin hende pa goberna, supervisa y Parlamento tin e control di Gobierno, pasobra Parlamento ta hefe di Gobierno”.
