Diamars atardi a tuma lugar un vragenuur den Parlamento unda cu riba peticion di Alan Howell di Fraccion di POR, Minister Otmar Oduber a contesta un total di 11 pregunta riba e tema di Parkietenbos, incineratornan y sanitary landfill.
Parlamentario Howell a keda contento cu e respuestanan ricibi y a indica cu e ta satisfecho cu despues cu dialuna a haci e peticion na minister atraves di Presidente di Parlamento, ya caba pa su siguiente dia e mandatario tabata presente pa contesta e preguntanan.
Mas aleu e ta bisa cu esaki ta un muestra cu tin un Parlamento nobo unda por wak cu awe parlamentarionan ta cuestiona ministernan cu ta pertenece na su mesun partido, algo cu anteriormente no tabata wak. “Ami como parlamentario ta representante di pueblo, na momento cu pueblo of mi mes tin pregunta, no ta interesami cua minister nos tin cu manda yama den Parlamento. Awe nos a manda yama Minister Otmar Oduber y nos a keda hopi satisfecho cu e splicacion duna na placa chikito pa tur hende por a compronde”.
Alan Howell ta lamenta cu no tabatin ningun colega di oposicion presente durante e vragenuur ya cu nan no a haci uzo di e oportunidad den cual tur parlamentario por haci pregunta na e mandatario presente y haya claridad en bes di bay grita pafo pa bruha tera.
Pa loke ta e preguntanan haci, parlamentario di POR a expresa cu ta di aprecia e proceso profesional, moderno y transparente cu gobierno ta moviendo cu e diferente destahonan cu ta tumando lugar pa entre otro e incinerator chikito, cual un compania local a gane, segun por a compronde for di e minister. Adicionalmente tin 3 destaho mas cu ta den proceso di wordo realisa, cual ta pa e remediation di e landfill, e sanitary y tambe esun di waste to energy.
E mandatario a splica tambe cu aki dos luna lo pr sa cual ta e companianan cu a gana e destaho pa despues bay over na lo cual tur hende ta anhela, esta elimina e ‘Hooiberg halte di sushi cu nos tur a crece ta wak na Parkietenbos”, segun Alan Howell a duna di conoce. E ta agrega cu ta inaceptabel cu na 2019 ainda nos ta procesa sushi den e forma aki y cu tur hende ta di acuerdo cu mester procesa sushi na un manera mas higienico y miho, bayendo den e direccion cu hopi pais rond mundo ta uzando, esta e waste to energy.
Mester stop e asunto di crea un seroe y kima, habitantenan den e barionan rond di Parkietenbos pa añanan largo a pidi gobierno anterior pa bin cu un solucion, pero ta te ora cu Minister Otmar Oduber den e gobierno nobo a tuma e cartera aki over, a pone como un di su prioridadnan pa trece un alivio pa cu esaki, pero tambe pa bin cu un diferencia den e forma di procesa sushi, segun e parlamentario di POR a indica.
Finalisando el a gradicidi Minister Oduber pa rapidamente acudi na Parlamento y contesta tur pregunta na un maenra transparente.