181
Ta importante pa inversionistanan ta na altura di nos 6 sectornan prometedor pa diversifica nos economia
ORANJESTAD – Diaranson ultimo Minister Ruiz-Maduro tabata den grabacion pa e programa ‘Aruba Business Excellence Episode’ di ‘Caribbean Vibrations TV’ di Canada cu e meta pa brinda informacion y propaganda e 6 sectornan prometedor pa diversifica economia di nos Pais. E programa ta wordo presenta pa e conocido Alain Arthur y lo wordo pasa den luna di september na Canada, na e ‘Tri-State New York Area y na 20 Isla Caribense. Durante e programa lo propaganda Aruba como destinacion turistico di luho y pesey e programa ta conta tambe cu un entrevista cu colega Minister Dangui Oduber durante e exitoso promer edicion di Island Fest na San Nicolas.
Cu e publicacion di e maneho economico pa un Aruba fuerte y resliente y den dje e identificacion di e 6 sectornan prometedor pa diversificacion di nos economia, Gabinete Wever-Croes ta trahando na un manera profesional y structural pa por atende cu e retonan economico di nos Pais. E ta importante pa no solamente inversionista local, pero esnan internacional tambe haya sa di e potencial cu tin na Aruba pa comercio y den cual sectornan esaki nan ta presenta. Tur aña hopi turista, entre nan comerciante, ta frecuenta nos ‘One Happy Island’ y mas hende den nos region ta mira Aruba como Pais potencial pa inversion. Pa e motibo aki nos mester haci uso di e avenida conoci pa turismo pa asina por propaganda Aruba como e ‘One Happy Investment Island.’
Nos ta conciente cu riba tereno di facilitacion di comercio na Aruba tin hopi trabou cu ainda mester wordo haci. Pesey mes tabata importante pa cuminsa fiha un maneho economico y den dje identifica e oportunidadnan pa awor nos por sigui concretisa e pasonan necesario pa incentiva, agilisa comercio na Aruba.