AVP den desesperacion bruhando tera keto bay! Cu e cambio husto den pago di grondbelasting Gobierno di Aruba a pone e ser humano central

Despues di e decepcion grandi y frustracion cu partido AVP a sufri di nan manifestacion fracasa di dia 12 di april ultimo y cu nan lider Mike Eman durante algun siman a bay den coma politico, awe e partido aki kier sigui cu nan racha di manipulacion y engaño door di venena mente di pueblo cu e gobierno actual lo a aumenta e tarifa di grondbelasting y cu esaki supuestamente ta un medida riba lomba di pueblo. Sinembargo e hendenan aki ta sufri di amnesia hopi pisa mes ya cu durante nan 8 aña di gobernacion nan ta esnan cu a percura pa aumenta e grondbelasting cu 15% di e balor di propiedad, cual siguramente ta un di e mas cu 30 medidanan cruel imponi door di Gabinete Mike Eman.

Ta p’esey partido MEP ta haya su mes obliga di bolbe trece padilanti con henter e asunto di pago di grondbelasting ta hinca den otro y caminda lo demostra con un gran parti di e comunidad a sali beneficia di e prome parti di reforma fiscal pa loke ta grondbelasting. Por cierto un reforma fiscal cu partido AVP debi na nan incapacidad y falta di curashi nunca a implementa esaki durante nan 8 aña di nan malgobernacion.

Beneficio pa un y tur

Hecho ta cu e politiconan di AVP no ta splica pueblo cu ta danki na Gabinete Wever-Croes:

1. 12 mil ciudadano no ta haya cobransa di grondbelasting mas.
2. Pa 16 mil ciudadano e cobransa di grondbelasting ta baha.
3. Pa esnan cu tin un propiedad cu un balor entre 250 mil y 500 mil florin, e tarifa ta 0.3%. Esaki ta conta pa 8996 contribuyente.
4. Pa esnan cu tin propiedad cu un balor di mas di 500 mil florin, e grondbelasting ta subi, pero mesun momento a duna compensacion den rebaho di inkomstenbelasting y dividendbelasting.
5. Pues por conclui cu 28 mil ciudadano awe ta mas contento. 30% di ciudadanonan no a conoce un cambio di Grondbelasting.

Tur esaki ta haci cu partido AVP ta di remate den e dianan aki y ta organisando entre otro un anochi di informacion, un anochi di manipulacion y engaño y p’asina trata di duna nan partido un tiki rosea bek, despues di nan manifestacion fracasa di april ultimo.

Ladronicia di terenonan di pueblo

Sinembargo lo ta bon pa riba e anochi aki e politiconan di AVP, na lugar di instiga pueblo contra tur e beneficionan cu un gran parti di nos ciudadania lo gosa di dje, duna un splicacion di e ladronicianan bergonsoso cu nan a comete cu tur e terenonan di pueblo durante 8 aña di nan gobernacion corupto caminda cientos di miles di m2 di tereno a ser otorga na nan familiar y compinchinan politico y kendenan directamente despues di a haya e terenonan aki mal haya manera un set di sinberguensa a core bende esakinan pa miyones di florin. Hortamento di tur e terenonan aki ta un di e maldad y corupcionnan di mas grandi cu nos pais a yega di experencia den su historia na man di AVP. Ta p’esey un splicacion amplio lo ta na su lugar riba e anochi aki door di dirigencia di partido AVP.