ORANJESTAD – E siman aki a tuma luga e Latin America Data Summit 2019. Esaki ta un encuentro importante pa Oficina di Turismo Aruba (A.T.A.) ya cu ta analisa e estadisticanan di e mercado turistico di e continente di Latino America. Di e forma aki ta determina ahustacionnan necesario pa loke ta maneho y mercadeo di nos isla como destino.
E Data Summit pa cu Latino America ta un evento cu ta tuma luga un bes pa aña. Di Aruba Tourism Authority, CEO Ronella Tjin Asjoe-Croes, CMO Sanju Luidens-Daryanani, y Gerente di Strategia, Investigacion y Planificacion Melanie Evans-Kelly a biaha pa Bogota-Colombia pa e acontecimento aki. Ademas tawatin participacion di representantenan di Brasil – Colombia – Argentinia – Peru – Chile y Venezuela, como tambe esnan encarga cu ‘advertising, PR’ regional pa e continente aki.
Data Summit
Entre e topiconan riba e agenda tawatin entre otro ‘The mandate for Growth – Value’ cu ta basta cla cu su obhetivo pa haya bishita di turista cu ta gasta. Ademas a combersa di ‘Millenials’ y ‘Kico e bishitantenan ta haci durante nan estadia na nos isla’. E mercado Latino Americano ta uno cu ta trece relativamente mas Millenials pa nos isla. Tambe a para keto riba e mercado cu contribucion durante e lunanan mas abou incluyendo mei, juni, september entre otro. E comportacion y resultadonan di cada mercado a wordo analisa profundamente; ken a logra atrae te cu awo, cuanto nan entrada anual ta, cuanto nan a gasta riba nos isla, con nan a gasta, kico nan interesnan ta y asina con por ahusta strategia di comunicacion conforme metanan stipula. A ricibi tambe un presentacion separa di Google, cu cual A.T.A. ta traha di cerca. Por ultimo, ‘tour operador’ prominente pa e region esta ‘Despegar’ tambe a duna un presentacion y pasa riba resultadonan pa cu Aruba.
Enfoke pa 2019 ta pa e mercado di Latino America crece cu 3.6%.
Ta bon pa menciona cu pa aña 2018, e mercado di Latino America a trece un total di 164.085 bishitante pa nos isla, cual ta representa 15.2% di e total di bishitante pa Aruba.
Honor na esnan cu a celebra nan aniversario
Pa Aruba Tourism Authority ta esencial pa semper reconoce e perseverancia y dedicacion di e miembronan di su ekipo. Cada pasa dos aña A.T.A. ta reconoce varios di su miembronan pa medio di e evento ‘YOU! cu un medaya special pa tanto aña di servicio. Den cuadro di esaki, durante e bishita na Bogota-Colombia, CEO di Aruba Tourism Authority Ronella Tjin Asjoe-Croes a honra varios miembro di e equipo cu ta ubica na Latino America trahando pa A.T.A., pa nan 5 aña di labor y dedicacion. Aunke tur a cuminsa na 2011, a celebra nan 5 aña e dia aki.
Nan tawata Luisana Requena Croes, Asistente Administrativa Venezuela – Dayanara Chinome, Gerente de Ventas Venezuela y finalmente Johana Santiago Infante, Gerente de Relaciones Publicas y Comunicaciones LATAM. CEO Tjin Asjoe-Croes di A.T.A. a expresa palabranan di elogio y aprecio y nan a ricibi un reconocemento di honor (medaya cu logo di Aruba) pa cu nan aniversario.