ORANJESTAD, Aruba – Pa algun aña Arubaanse Voetbal Bond (AVB) ta traha pa implementa club licensing, cu ta licencia pa por participa den e campeonato organisa door di e federacionnan. AVB a conta cu presencia di representante di FIFA, cu a duna un presentacion riba club licensing. E ta algo implementa pa CONCACAF y FIFA. El a bira algo cu ta un obligacion di tur federacion pa introduci club licensing. AVB mester a incorpor’e den nos reglamento domestico y esaki a tuma luga na 2017. Awo ta yegando e fase caminda p’e campeonato 2019/2020, e clubnan mester bay cumpli cu cierto rekesitonan.
Conhuntamente cu e federacion, AVB ta trahando riba esaki. Pa por dun’e un tiki mas seriedad y p’e clubnan por compronde cu e no ta bin for di e federacion, pero ta algo implementa pa CONCACAF y FIFA. A haci un invitacion na CONCACAF pa duna un workshop. Nan a duna mas splicacion kico ta club licensing, kico ta e rekesitonan, pakico e club licensing, unda nos ta y kico ta di spera di esaki den añanan padilanti.
Ing. Richard Dijkhoff, presidente di AVB, ta kere cu e ta algo cu mester tuma hopi na serio, pasobra hopi biaha tin e tendencia cu ora di implementa algo, e no tin seriedad. Den e caso aki FIFA y CONCACAF a pone hopi enfasis riba e club license, pa motibo cu esaki nan kier yuda e organisacionnan pa structura nan mes miho. Tambe organisa nan mes miho,cumpli cu e rekesitonan miho.
Ta bay yega e fase pa participa den campeonato, tin cu haya e licencia. Si no cumpli por ehempel tin un forma di implementacion di boet. E sancionnan gradualmente lo cuminsa bira mas pisa, te ora e momento yega cu no lo haya permiso of licencia pa participa den campeonato. Aki ta papia di sancionnan, pero tambe di incentivonan mara na e club license.
E clubnan cu cumpli lo bay ricibi por ehempel sosten financiero for di e bond. “Mi no por obliga e club cumpli cu e rekesitonan, sin cu mi ta dun’e ayudo p’e por cumpli cu e rekesitonan”, segun Richard Dijkhoff. Pa por duna un tipo di incentivo, e ora hunto cu FIFA a yega na palabracion cu e clubnan lo ricibi un suma pa locual cu nan tin di haci. Claro esaki ta mara na exigencianan cu lo bay bin pa clubnan cumpli cu esaki.
E exigencianan ta cuminsa hopi leve, pero gradualmente lo bira mas pisa entre otro. Nan lo mester entrega un relato financiero, coachnan di e team mas halto ta certifica. Tambe nan mester tin tur divicion, tur categoria di lifida. Kiermen exigencianan cu poco poco, gradualmente lo bay aumenta y na final di cuenta e clubnan ta bon organisa.
Tin un organisacion completamente su tras y por ehempel e prome stap cu mester haci ta cu e federacion mester nombra un club license manager. E lo ta responsabel p’e implementacion di e club license. Lo bay tin un comision independiente, cu lo mester bay evalua tur formulario pa mira si e clubnan ta cumpli cu e exigencianan. Ora nan tuma di decision, por ehempel un club no ta cumpliendo tur rekesito, e ora ey conhuntamente cu e federacion pero tambe cu CONCACAF lo mira den ki forma por duna sosten na e club. Na comienso tin espacio pa dialoga riba e parti ey, pero ta yega un momento cu bo ta cumpli of no. Pa motibo di implementacion, aworaki ta na e fase inicial. Ta bay tin espacio pa guia e clubnan pa nan por cumpli cu e exigencianan.
