Home International Homber cu ta meti den traficacion ilegal di personanan a keda deteni,...

Homber cu ta meti den traficacion ilegal di personanan a keda deteni, pa resisti su detencion y no sigui ordo di polis

SHARE

Las Cumaraguas, Estado Falcon, Venezuela: Dialuna den careda di 5’or y mey di atardi, un homber yama Cristian a trata na huy for di autoridad na momento cu e tabata canto di lama na Las Cumaraguas, Sector Medano Caribe ela nota presencia di polis, pero polis uniforma di Pueblo Nuevo di PAraguana a logra detene, durante investigacion a resulta cu Cristian ta forma parti di un banda cu ta meti den traficacion ilegal di personanan pa islanan den caribe, manera Aruba y Corsou.

Hefe di polis di Pueblo Nuevo a informa cu Cristian ta di e municipio Los Taques y ta residencia na Villa Marina. Cristian tabata esun encarga pa trafica pasaheronan cu lancha pa diferente isla di caribe, pa asina nan por haci nan entrada ilegalmente na e islanan aki.

Na momento cu polis a nota un auto bandona na costa cerca di lama, nan a bay controla y a mira con Cristian a bula na awa lagando su auto atras, pero asina mes polis a logra domine y detene, Cristian mester a presenta dilanti Fiscal na Ministerio Publico no pa traficacion di hende pero pa no sigui ordo di polis y resisti su detencion.

E homber aki ta un di e traficadornan di persona cu ta transporta personanan ilegalmente for di Venezuela pa varios isla den Caribe, incluyendo Aruba. E la keda deteni, pero no pa traficacion di persona, pero solamente pa no sigui ordo di polis y resisti su detencion, pa esaki elo por wordo persigui.

Mientras traficacion di persona ta un delito cu lo mester wordo considera algo hopi serio, paso ta subi lama grandi cu lanchanan sin pasa aduana of imigracion prome cu sali, pues sin wordo controla door di autoridadnan Venezolano. E pasaheronan no ta tur sa landa, e ta un riesgo grandi y hopi biaha ta mandanan bula na awa landa bay tera, esaki hopi biaha den oranan di anochi, te hasta den lama bruto y hundo cu tur e consecuencianan cu ta bin cune.

Lamentabelmente den pasado tabata tin cierto pasaheronan cu no tabata sa landa y a hoga. Na momento cu nan subi tera e chens ta grandi cu nan lo por cay den man di autoridad local. E traficadornan di persona, unicamente pensa riba e placa y ta tuma placa di e personanan cu hopi biaha ta desespera, cu kier tin un futuro, of tambe pa un of otro motibo kier huy for di Venezuela.

E traficadornan aki sin pensa riba tur e riesgonan, peligronan cu esaki por trece cu ne, ta djes pensa riba traha placa y mesora ta start motor bay direccion nort. Un situacion hopi tristo y un negoshi lucrativo pa bandanan criminal, cu ta mantene nan mes ocupa cu traficacion di hende.