Durante un encuentro e siman aki den Parlamento cu Minister di Enseñansa a trata e tema di Traimerdia. Parlamentario di POR, Alan Howell a indica cu e reunion aki ta uno hopi importante pa tur esnan cu ta traha na Traimerdia y Nos Atardi.
E por compronde e situacion di e personanan aki, kende ta sinti nan mes hopi bruha cu tur loke ta pasando. “Mi mes a keda bastante confundi despues di e diferente reunionnan cu tabatin unda a scucha diferente criticanan y opinionnan cu tabatin”.
Howell ta di opinion cu lo tabata miho pa yama un reunion publico y no un encuentro (bijeenkomst) pa asina e empleadonan por a haya contesta riba e preguntanan, dudanan y inkietudnan cu nan tin.
Riba declaracionnan di e minister en cuestion, kende a bisa cu el a pasa den un forma global riba e preguntanan ricibi for di parlamentarionan, Alan a indica cu pasa di e forma aki riba e preguntanan no lo yuda. E mes lo a desea di scucha e respuestanan riba esakinan pa asina por haya claridad y por papia cu e trahadornan y si mester sigura e trahadornan cu loke ta ser papia pafo en berdad ta ‘fake news’. Pesey el a pidi Minister di Enseñansa si e por a contesta toch e 50 preguntanan realisa na su persona por escrito.
Despues cu parlamentario Alan Howell a presenta esaki, varios di su coleganan a pidi pa enberdad haya e contesta di e 50 preguntanan por escrito of pa yama un reunion publico pa por atende e situacion di Traimerdia den forma amplio y haya e respuestanan cu no solamente e parlamentarionan, pero specialmente e trahadornan di Traimerdia merece y kier haya sa.
Despues di e encuentro empleadonan di Traimerdia a gradici Parlamentario Howell pa para tras di nan dignamente.