ORANJESTAD, Aruba – Aruba Bank lo ta presente cu un booth cu informacion y guia pa ceramento di hipoteca pa tur futuro doñonan di tereno na DIP su evento di informacion y di pre-reservacion di terenonan cu ta otorga e aña aki ainda.
E evento lo tuma luga na e oficina di DIP, den e edificio di DOW na Wayaca dia 29 di Mei 2019. Gobierno di Aruba lo duna splicacion amplio y detaya na tur doño di tereno. E formula di pre-reservacion ta pa e futuro doñonan por regla un financiamento na banco, prome cu otorga e tereno na nan. Cu e sistema aki ta evita cu e ciudadano tin tereno na su nomber pero no ta construi nada riba dje.
Aruba Bank, semper pro activo, lo ta presente na e evento pa atende tur cliente cu informacion, ofrece nan e diferente paketenan di hipoteca pa construi e cas di nan soño. Aruba Bank tin varios oferta cu ta cumbini e futuro doñonan di un tereno pa nan cas, den cual ta financia e cas, ta atende cu e tramitenan di notario, seguro y hasta mueblenan. Di e forma aki e cliente ta cera un solo hipoteca cu ta encera e cas completo.
Ta invita tur persona cu ta atende e evento pa haci uzo di e oportunidad pa busca mas informacion riba e paketenan di hipoteca cu Aruba Bank tin pa ofrece. E ekipo completo di e seccion di hipoteca lo t’ey pa comparti tur informacion y duna guia na e clientenan den con pa atende e asunto aki miho.
Ta hopi importante pa menciona cu e periodo di pre-reservacion ta di 30 dia cu NO ta wordo prolonga. Es decir, pa e grupo cu a bin na beurt, tin te cu fin di Juni e tempo pa entrega nan carta na DIP.
