Oranjestad- Pa e di cuater aña consecutivo, A.T.A. ta forma parti y ta inverti den ‘Raad Van Kinderen’ na Aruba pa conscientisa hobennan y asina amplia conocemento di e industria turistico y laga hobennan participa activamente den loke ta e pilar di nos economia, esta e industria turistico. Cada aña ta scoge un scol preparatorio unda cu e alumnonan ta haya e tarea di formula solucionnan pa un dilema particular. Durante e aña escolar actual, Pius X School a haya e oportunidad pa traha hunto cu Oficina di Turismo pa soluciona e pregunta/ dilema: ‘Con A.T.A. por percura pa Aruba ta mas atractivo pa turistanan cu ta biaha cu famia, y pues incluso cu muchanan?’
E asina yama ‘Raad van Kinderen’ ta un iniciativa di Prinses Laurentien di Hulanda bao di e fundacion ‘Missing Chapter’ y Unicef den cual muchanan di scol ta cera conoci cu diferente industria y organisacionnan, cu ta duna nan un dilema pa nan resolve. A base di e dilema cu A.T.A. a formula pa klas cinco di Pius X School nan a haya presentacionnan cu ta splica di e tema den cual, entre otro, a papia riba e retonan pa loke ta famia y muchanan den sentido di actividadnan pa haci, tambe actividadnan cu por haci hunto cu nan sernan keri y con e muchanan cu ta turista por beneficia di cambionan cu ta refleha nan punto di bista y lo beneficia e muchanan local, pero tambe e turista. Esaki ta rekeri tambe pa pensa riba solucionnan nobo pa nos isla y pa mira situacionnan for di un otro perspectiva.
Presente durante e bishita di A.T.A. tawata Ronella Tjin Asjoe-Croes CEO, Patrick Melchiors DSU Manager, Isha Tapias-Kock Product Specialist y Jonnie Tilma Communications Specialist. Nan a topa, sinta y scucha e grupo di alumnonan riba nan recomendacionnan pa cu e dilemma ‘Con A.T.A. por percura pa Aruba ta mas atractivo pa muchanan turista y nan famia?’
Por bisa cu e proyecto aki tawata uno exitoso e aña aki tambe. A.T.A. ta hopi satisfecho cu e ideanan cu a wordo presenta y tambe sorprendi di e variedad di maquettenan colorido cu a wordo traha pa asina pone enfasis di loke e studiantenan ta desea pa por voer uit nan concepto na Aruba.
Despues di e sesion di dialogo, directiva di A.T.A. y di ‘Raad van Kinderen’ lo sinta hunto pa analisa e informacion obteni y con por implementa esaki den e plannan existente of riba termino corto. E oportunidad ta uno cu ehecutivonan a probecha pa reta e muchanan haciendo preguntanan cual a keda bon contesta.
A.T.A. ta kere y ta sostene e proyecto firmemente ya cu ta brinda un plataforma den cual nos muchanan por amplia nan conocemento riba nos industria turistico, y e oportunidad pa participa activamente desaroyando nan di responsabilidad civico. Por ultimo A.T.A. ta gradici e cabesante di e scol, e maestronan di e klas pa nan tremendo colaboracion.
