DPL cu tey desde 2011 tin como meta pa “informa, stimula participacion laboral y yuda nos buscador y dunadornan di trabao local pa yega mas serca di otro riba e mercado laboral”. Pero ken tur e gobiernonan a yuda di berdad pa medio di DPL? E trahador di afor? Pasobra te dia di awe nos di CURPA no a tende di 1 caso ni a mira prueba di niun gobierno di 1 caso den cual 1 trahador local a haña trabou via DPL. Un solicitante local a conta nos cu DPL no ta ni usa e formulario mas cu e doñonan di trabou mester stempel ora cu un trahador local a solicita serca dje. Pues e doñonan di trabou por gaña facilmente cu niun trahador local a solicita serca nan. Y DPL ta informa e doñonan di trabou di e resultado di su peticion pa un trahador di afor pero te dia di awe nunca nos a mira un carta di DPL na unda e ta informa e trahador local cu a busca trabou via DPL kiko a pasa despues cu ela solitica. Esey sí ta keda scondi. Pakiko ta paga belasting pa DPL y DIMAS anto si keto bay tin ilegalnan trahando na gran escala, y permisonan ta wordu parti keto bay sin ningun evidencia di e controlnan necesario. Ainda nos ta tende di tramitador aki, tramitador ey cu “lo a regla permiso mas liher cu DIMAS”.
Un maneho di Stranheria pa robez bou di tur gobierno cu a haci cu awor na hotelnan y restaurantnan tin trahador di afor ta ganando tips y mandando gran parti di e placa afor, mientras tanto e trahadornan local cu experiencia mes ta sinta na cas. Y cu a haci cu awor e hotelnan ta parce di ta haciendo tur esfuerzo pa kita trahador local di hopi aña pa reemplaza nan cu cheap labor di afor. Y cu keto bay tin commerciantenan cu ta sigui pak Aruba cu mas trahador di afor sin importa tur e consequencianan negativo pa socio economico, ambiental y financiero pa Nos Pais.
Hopi a wordu papia perio te dia awe niun gobierno por a prueba ningun resultado. Pesey nos ta kere cu ta bira tempo pa e gobierno aki tambe stop di papia y cuminsa haci. Lage instrui DPL pa e bin bek cu e formulario bek cu e doño di trabou ta stempel ora e hende local bin solicita y bin cu transparencia. Pa evita Caso Ibis Parti 2. E bay mustra pueblo cuanto hende local a solicita via DPL pa cada vacatura (trabou), Y lage instrui DIMAS publica pa cada vacatura (trabou) cua conseho ela recibi di DPL. Pueblo tin derecho pa sa cuanto permiso a wordu duna door di DIMAS pa cada tipo di trabou. Lage prueba cuanto boet e la duna na esnan cu ta emplea illegal y cuanto placa ela recibi. Cuanto illegal a wordu deporta. Y cuminsa recompensa e pueblo pa reporta ilegalidad.
Si gobierno no bin cu prueba, anto e ora ey e no a traha na interes di e trahadornan local y punto. Y si no tin transparencia, anto e riesgo a keda halto pa corrupcion.
Nos ta liber pa scoge pero nos no ta liber di e consequencianan. Pregunta ta kiko boso como pueblo mes kier. E choice ta masha simpel. Si boso no tin problema cu un Aruba mas yen cada dia, mas desempleo local y ningun oportunidad pa boso yuinan (studia) vota pa tur otro partido. Pero si boso kier accion y resultado ta 1 opcion so tin y esey ta nos di partido CURPA.