Home Politics Minister Dangui Oduber presente na e apertura di Olimpiada Escolar 2018-2019

Minister Dangui Oduber presente na e apertura di Olimpiada Escolar 2018-2019

SHARE

Minister Dangui Oduber a hiba palabra y a tira e prome bala pa asina inicia Olimpiada Escolar 2018-2019.

ORANJESTAD – Memey di un publico cu tabata consisti di entre otro studiantenan, mayornan, maestronan, instancianan deportivo, minister y parlamentarionan, a haci e inicio oficial na Olimpiada Escolar 2018-2019. E olimpiada escolar ta un evento cu pa hopi aña a ser descontinua, pero bou di e maneho nobo di deporte, a percura pa trece esaki bon, stimulando di e forma aki deporte cerca nos hobennan.  Ademas a uza e evento aki pa por duna un conscientisacion na nos hobennan riba e parti di ecologia, como tambe a tuma e oportunidad pa duna reconocemento na un persona cu a aporta grandemente na deporte escolar.

E olimpiada aki ta haya su representacion simbolicamente di Aruba su naturalesa. Pa e motibo aki, a duna e olimpiada e titulo di ‘Un homenahe na nos Tera y nos Naturalesa’! E fuentenan di inspiracion ta amplio y ta cubri tur aspecto cu ta di influencia positivo. A uza e cuater elementonan di naturalesa, e cuater disciplina artistico, e cuater puntonan di compas, e cuater rasanan di humanidad, e cuater esencia di existencia humano, e cuater temporadanan di aña, e cuater etapa di desaroyo fisico y tambe e cinco colornan di e logo olimpico. Esakinan tur hunto ta forma e base di loke e Olimpiada Escolar ta representa.

Durante e ceremonia di apertura pa Olimpiada Escolar 2018-2019, esnan presente a gosa di un programa amplio. Despues di e desfile, a canta e himno di Aruba y el a ser sigui pa palabranan di Minister di Deporte, Dangui Oduber. “Deporte ta un instrumento necesario den bida di nos tur como ciudadano di un pais. Hopi bes nos no ta para keto y reflexiona riba e importancia cu esaki tin pa e desaroyo di nos bida y tambe comunidad. No solamente e parti fisico, cual mas cu claro ora di practica un deporte, bo ta yuda tene bo curpa mas saludabel. Sino e hermandad, e union unico cu deporte ta trece cu ne, ta locual cu ta haci e comunidad solido”, tabata palabranan di e mandatario.

E programa a continua cu declamacion di e poema ‘Spirito di Competencia’, presenta pa e hobennan di Arte di Palabra. Despues di e bunita presentacion aki a haci e inicio oficial di e olimpiada, na unda a duna homenahe na e elementonan di awa, tera, biento y candela. A sigui e apertura cu cendemento di e antorcha (candela) olimpico y asina e apertura di Olimpiada Escolar 2018-2019 a ser declara oficialmente habri.

Como broche di e programa, a pasa over pa duna homenahe na sr. Rufo Kelly, na kende e olimpiada a ser dedica. Sr. Rufo Kelly su historia cu deporte ta uno ehemplar y remarcabel. Na banda di un historia deportivo escolar largo,  na 2002 ora cu a introduci e prome Olimpiada Escolar, bou encargo di sr. Rufo Kelly, e scol Colegio Laura Wernet Paskel a sa di bira e prome scol cu a keda titula manera ‘ overall winner’. Minister Dangui Oduber a expresa algun palabra di na sr. Kelly, y el a bisa cu “e dedicacion di sr. Rufo Kelly ta uno ehemplar. Si mas maestro y personanan den nos comunidad sigui su pasonan, e futuro di e generacionnan pa bin lo ta uno briyante. Danki sr. Rufo pa e stempel aki cu bo a pone.”

Finalmente Minister Dangui Oduber a tira e prome bala y asina e prome wega di Olimpiada Escolar  2018-2019 a cuminsa! Exito na cada un cu ta participando.