Pa fundacion Sea Bunita Sea Bo mes, ta un honor pa anuncia participacion di Akisha Albert, den e fashion show di nos muchanan y hobennan special di Aruba dia 8 di juni proximo den Renaissance Convention Center.
Nos tur por corda Akisha ariba escenario di e competencia mas grandi di beyeza Miss Universe aña pasa unda cu Akisha a representa nos hermana isla di Curacao y a logra top 10 finalista di e certamen aki. E biaha aki Akisha ta bay modela ariba pasarela cu nos muchanan y hobennan special y tambe di Curacao nos tin mas invitado cu lo bay forma parti, entre otro e cantante AEmy, famoso na Curacao lo comparti su canto cu e publico di Aruba cu su cancion Nia Feliz.
Tur cos ta den full swing cu hopi entusiamo y preparacion ta wordo haci pa e gran anochi aki unda nos muchanan y hobennan special lo briya. Fundacion Sea Bunita Sea Bo mes, ta contento con tur cos ta canando pa cu e gran anochi di e fashion show aki. Sorpresanan lo keda presenta hunto cu tur nos celebridadnan y cantantenan di Aruba cu lo participa, canto y baile y hopi mas durante e gala fashion show aki. Tambe nos por a aprecia y ta di admira y bisa danki for di awor na tur nos tiendanan, boutiquenan cu ta sosteniendo nos muchanan cu nan vestuario pa e anochi aki.
Cumpra bo carchi pa e grandioso show aki na balor di awg 35,– cerca tur mayor di nos muchanan special y pa mas info por contact sra. Marienela Geerman na cel # 733-1431.
Ban duna tur sosten y apoyo na nos muchanan y hobennan special den nan lucha pa inclusion den nos comunidad.