Home Politics Parlamentario Alan Howell Tur hende merece pa ta feliz

Parlamentario Alan Howell Tur hende merece pa ta feliz

SHARE

 

 

Alan Howell tin e deseo pa nos tur por ta feliz y un peticion cu el a bin ta haya for di hopi ciudadano for di momento cu el a drenta Parlamento ta pa e ciudadanonan bibando den e asina yama ‘casnan di pueblo’ por bin na remarke pa cumpra nan cas.

E ciudadanonan aki, cual varios di nan ta bibando pa hopi aña den e cas ta buscando tur forma posibel pa por cumpra e cas cu nan ta bibando aden prome cu nan baha cu pension of prome cu nan cera nan wowo y asina nan por tin nan propio cas.

Howell a indica cu den preguntanan haci na Minister Otmar Oduber, e mandatario a conteste cu e ta trahando duro riba e Landsverordening cu mester yega Parlamento. Asina esaki yega, parlamentarionan por aprobe y asina den corto tempo por duna e bon noticia na tur ciudadano cu ta bibando pa hopi aña den casnan di pueblo cu nan por bin na remarke pa cumpra nan propio cas.

“Mi mes ta sumamente contento cu e informacion aki mirando cu ta un preocupacion cu ta reina den pueblo pa hopi aña y mi ta na altura cu den gobernacion anterior e no a haya prioridad y den e gobernacion aki nos mester pone e tema aki como prioridad. Ta hopi importante pa nos hendenan por tin e oportunidad pa cumpra y tin nan mesun cas”, parlamentario di POR a duna di conoce.

El a agrega cu e ta bay bringa duro pa zorg cu esaki bira un realidad y dentro di poco lo yega Parlamento y a haci e peticion na tur su coleganan parlamentario pa sostene e Landsverordening aki pa por haci nos hendenan contento y feliz.