Conforme e ordenanza di Monumento, AB 1991 no GT 46, articulo 4, Minister di Cultura, sra. mr. Xiomara Ruiz-Maduro, ta indica por medio di un decreto pa un edificio bira un monumento proteha. Monumentenbureau ta e instancia di gobierno encarga pa ehecuta e proceso di proteccion. Directora di Monumentenbureau, sra. ing Yvonne Webb-Kock tin e mandato di e Minister di Cultura pa e.o. efectua den su nomber e proteccion. Den e proceso y conforme e ordenanza ta scuha Monumentenraad cu a duna aprobacion.
Monumentenbureau ta e instancia gubernamental engarga cu e ordenanza di Monumento, ta encarga cu tur asuntonan general di monumento, ta prepara y desiña y traha e descripcion pa destaho pa restauracion di monumento, ta supervisa y maneha restauracionnan, ta controla y duna permiso di monumento, ta encarga cu tur asuntonan technico di monumento, duna informacion y educa y ta e instituto di conocemiento di monumento di Aruba. E departamento gubernamental aki ta ekipa cu e expertonan di monumento di Aruba.
Monumentenbureau a prepara e decretonan ministerial pa e edificio Pos Abou 19 wordo indica como monomento proteha. E decreto ta wordo manda cu un carta oficial pa e doño(nan), usuario y pa e hypotheekkantoor di DLV y un notificacion lo wordo publica den e Landscourant di Aruba. Despues di seis siman di a sali den e Landscourant e lo por wordo inscribi den e Registro di Monumento.
Pa por a prepara Pos Abou su descripcion pa indicacion pa monumento proteha mester studia e edificio bon. Un preparacion asina ta tuma varios siman pa investiga, prepara y documenta pa un edificio monumental ta describi por completo. Asina ta describi exactamente cada facada y ta pone enfasis riba cada elemento monumental, material, etc. Alabes ta studia portretnan bieuw, cu ta hopi dificil pa haña, indicando e elementonan pa den futuro considera tambe pa trece bek. Ta menciona tambe e elementonan cu no tin balor y tambe elementonan cu mester wordo cambia. Monumentenbureau alaves a bai haci un entrevista cu e famia pa nan conta nos e historia di e cas.
E cas na Pos Abou 19 ta den e estilo di arkitectura di un cas di cunucu. E cas a wordo construi na 1930 dor di Mario Rosario Tromp (1 oktober1899, t1984). Segun su yui muhenan e cas tabata antes un cas floria, pero despues a kita e simbolonan. Si enberdad tabata tin simbolo di cas floria riba e murayanan antes, esaki lo a wordo efectua dor di e metslanan manera Hilario Christiaans, of un di e senornan Donata of Tromp. Tambe e cas antes tabata tin un dak di panchi cu parti abou e dak paden tabata wordo sera cu pleister di kalki.
Mario Tromp tabata casa cu Johanna Stebana Tromp (2 augustus 1900, t 1963). E pareha a haya 3 yui homber y seis yui muhe. E yui muhe mas hoben ta sra. Faustina Tromp (24 december 1936)cu tabata e ultimo propetario di cas, prome cu a traspasa esaki pa Fundacion di Monumento di Aruba. Sr. Mario Tromp tabata gusta su tabaco cu e tabata huma of kauw y tabata traha como cuidador na e Refineria di Shell na Eagle.
Alaves e tabata un piscador, y tabata tin su boto di bela di 24 pia. E tabata drecha taray y tabata gara mas tanto sardin y piskechi. Riba e tereno na banda tabata planta bonchi salada, jambo, maishi, mispel, mango y patia. Sr. Mario tabata tin cabritonan y porconan. Ora a stop cu agricultura e magashina riba e tereno a wordo usa como luga di cose na unda e yui muhenan tabata traha paña di sako di hariña blanco y pa fiestanan tabata cose paña di papel. E magashina tambe a haya uso como luga pa e nietonan hunga y baila. Tradicion den famia tabata cu ora un persona ta haci aña ta ricibi un pida habon, puiro y un boter di ‘Awa di Florida’ como regalo. Riba e tereno tabata tin un pos di awa y bandi e pos tabata tin un vloer basha na unda e famia tabata baña. Tabata hisa e awa cu un pes. Pa uso sanitario taba tin un bester antes. E pos cu e bester no tei mas.
E edificio tin tres hadreinan Esun memei y di nort a wordo construi prome y despues e hadrei di zuid. Nan tabata drumi riba catro, kot y riba matnan. E tereno ta sera cu un transhi y esaki tambe ta den e indicacion aki pa wordo proteha. Balornan manera, saya cu djeki, fogon, werchi, estilo di arkitectura, transhi y magashina ta halsa e totalidat di e edificio monumental aki. E cas ta basta intacto.
E edificio monumental aki ta cai den categoria A y ta e gategoria mas halto cu tin pa edificionan monumental. E criteria di seleccion pa indicacion pa bira un monumento protehi na Aruba den categoria A of categoria B ta stipula den un di capitulonan cu ta forma parti di e ‘Monumentenhandboek Aruba’.
Pos Abou 19 lo bira e di 37 edificio pa wordo registra riba e lista di monumento proteha. Adhunto tambe algun portet bieuw di e edificio monumental. Pa mas informacion di monumento por bishita e facebook page di Monumentenbureau y ‘like’ nos. Por pasa tambe na nos oficina situa na Schelpstraat 36-38. E vision di Monumentenbureau ta pa nos cuminsa rescata nos patrimonio pa despues restauranan pa nan keda pa nos siguiente generacionnan. Monumentenbureau kier a gradici sra. Faustina Tromp, sra. Ursula Giel-Tromp, sra. Seferina Hidalgo Tromp, sra. Greta Gomez, sr. Monchi Gomez , sr. Cheche Gomez, sra Ruth Kelly y sra. Iris Giel, pa a aporta na ricibi nos pa haci un entrevista pa realisa e informacionan.