ORANJESTAD – Fin di siman Fundacion Family First a tabata tin nan curso “Conoce bo Pareha.” Un fin di siman constructivo unda hopi material interesante a keda comparti cu e pareha cursisitanan. Den un scenario ameno y ambiente positivo cursistanan a pasa un fin di siman unda facilitadonan a comparti hopi informacion valioso riba un manera real y relacional.
“Pa nos eigenlijk na comienso no tabata sa kico spera, pero mi tin di bisa cu el a bay hopi mas miho cu nos a kere cu e lo a bay. E contenido cu a keda comparti cu nos tabata hopi bon pa nos como individuo, como tambe pa nos como pareha. Cada facilitado tabata hopi bon den nan materia y bo ta sinti cu nan ta literalmente bib’e. Yudando nos compronde unda nos ta, y con pa expresa nos mes emocionalmente,” cursista Sra. Marigin Rafael a bisa.
“Nos a haya por ehempel cierto preguntanan cu a wordo puntra na nos, – manera, “kico ta bo pelicula preferi” – for di cual bo no lo a pensa di saca tal informacion via e pregunta ey, pero cu ta refleha cada persona su deseo den e relacion y na mes momento ta permiti bo pareha conoce bo mas miho. Diadomingo nos tabata tin e ‘cierre perfecto’ ya cu nos mester a traha nos vision y mision como pareha pa e proximo 3 aña, den un estilo di un obra di man, y nos a traha esaki hunto.”
“Ami cu mi pareha, nos tabata sa caba varios cos cu nos kier logra, pero cu e hermentnan cu nos a haya henter e fin di siman, el a enrekece nos conocemento y nos por a solidifica esaki den un vision,” Rafael a indica.
Cursista Sra. Erilu Arcaya a comparti e sigiente palabranan, “Di ora mi a yega, mi a sinti un bon vibe y for di e momento cu e prome facilitado a cuminsa, mi a bisa, “Esaki ta bay ta un fin di siman hopi bon.” E tabata un momento pa reconecta y ambiente tabata hopi dushi y positivo. Mi no tin nada negativo di bisa pero hustamente, mi gana. El a añadi hopi na mi bida, ta e tempo a caba riba nos eigenlijk.”
Sra. Arcaya ta sigui bisa, “No tabata tin huzgamento, pero solamente material cu ta hasi bo crece. Kico cu bo puntra of bisa, nan tabata tin un manera hopi comfortabel pa contesta y presenta bo cu informacion hopi valioso cu ta duna bo un otro manera pa wak e cosnan. Generalmente, e tabata, “Esaki ta e bofta den bo cara y awo bay haci algo cu ne.” Y nan ta facilit’e, relacionando cu bo. Di manera cu nan mes a bib’e, nan ta present’e y mustra bo con pa bo cana cu ne di manera cu e lo mehora bo relacion.”
“Nos ta desea cu nos tabata tin mas tempo cu nan, y a puntra nan tambe ki dia tin un otro atrobe pa nos por bolbe bini hunto.” Sra. Arcaya a termina bisando.
E meta di Fundacion Famiy First ta pa fortalece famianan na Aruba door di alcansa famia y individuonan pa ofrece sosten, conocemento y servicio cu lo dirigi nan riba e caminda pa ta un famia fuerte, estableci y sostenibel.
Un danki masha grandi ta bay na tur facilitadonan, Sra. Enid de Kort di Asuntonan Social, Sra. Sharleen Tromp di Insync Aruba y Sr. Raymond Maxwell di EDUMAX, tur pareha cu a pone nan mes disponibel pa siña algo nobo y nos sponsernan – De Palm Tours – y fiel sponsornan priva cu ta aporta na e gran causa y vision, “Famianan sano pa un Aruba Prospero.” Sigui Fundacion Family First Aruba – @stg.familyfirstaruba – ariba Facebook y keda informa di cursonan binidero. Por tuma contacto via e-mail na [email protected] of na tel 5820099 y 6999928.