Siman a habri cu un fecha hopi especial pa Premier Evelyn Wever-Croes, e fecha riba cual 10 aña pasa, el’a drenta den politica. El’a cuminsa su carera politico como candidato riba lista di MEP, despues el’a saca su mes y a bira Parlamentario pa MEP, el’a bira lider di partido despues di dos aña, y lider di Fraccion. Awo e ta Premier di Aruba. Durante e 10 añanan ta hopi cos a pasa. El’a mira e parti bunita di politica, y el’a mira e parti mahos di politica. Di ambos parti bo mester siña, pa bo por sigui padilanti mas fuerte. El’a drenta den politica cu e compromiso di brinda nos ciudadanonan, especialmente nos hende muhe y muchanan, un miho calidad di bida, un compromiso cu awe ta mas fuerte cu nunca. Pabien Premier!
E prome mita di e siman Premier Evelyn Wever-Croes hunto cu Premier di Corsou Eugene Rhuggenaath tabata na Washington pa reunionnan hunto, pa asina enfatisa e impacto severo di e crisis migratorio di Venezuela riba Aruba y Corsou. Otro topiconan cu tambe a haya atencion tawata e Refineria y Economia. Premier Evelyn Wever-Croes ta mira atras riba dos dia di trabou pisa, pero fructifero, den cual a demostra cu hunto nos ta mas fuerte, y den cual por a estrecha lasonan entre Aruba, Corsou y Merca.
Bek na Aruba, diaranson dia di famia, Premier a enfoca cu e famia ta e prome instituto na unda nos ta wordo educa y nos ta siña e balor y principionan moral.
Riba diahuebs, dia mundial di conscientisacion di presion halto, Premier, mustrando e ehempel a haci check up di presion, y su presion a sali bon. Sa Bo Numbernan Check y conoce bo presion. Bo salud, cuid’e!
Diahuebs e hoben Savion Kock di klas 4 di Scol Basico Washington a entrevista Premier pa su spreekbeurt. Ela haci Premier varios pregunta, y riba algun pregunta Premier mester a pensa hopi, entre otro kico e ta gusta haci den su tempo liber, y el’a realisa cu hopi tempo e no tin tempo liber. Pero e tempo libernan lo bolbe. Awo ta Aruba prome.
E siman aki Gobierno di Aruba a tuma despedida di Gijs Baars representante di Hulanda na Aruba y Gobierno a cera conoci cu David Abrahams cu ta bay reemplasa Gijs Baars na augustus.
Premier diahuebs ultimo tabata den Parlamento pa un bijeenkomst di dos ora, den cual el’a duna informacion riba e tema di Venezuela y refineria. Tambe el’a duna relato di su biahe pa Washington. Casi 40 pregunta di Parlamentarionan, cu a wordo contesta mesora, demostrando asina cu transparencia den e proceso aki ta hopi importante.
Diahuebs, hunto cu colega Minister di Finansas Xiomara Maduro a efectua aperura di AMC Unicon su mega store. Pabien AMC Unicon, y danki especialmente na e staf y empleadonan di AMC Unicon.
Y pa clausura siman, Banco Central hunto cu Premier Evelyn Wever-Croes y Minister Xiomara Ruiz-Maduro a lansa placanan di papel nobo. E placanan di papel nobo aki lo ta den circulacion entrante 3 di juni. E placanan di papel actual por wordo uza den e siguiente 10 siman y comunidad tin e oportunidad pa cambia e placanan di papel biew pa esunnan nobo durante e proximo 6 lunanan na banconan comercial. E diseño nobo a wordo haci pa sr. Nigel Matthew kende a gana esaki despues di un destaho riguroso.
Un siman pisa, cu hopi compromiso, pero mes momento hopi fructifero.