Home » Melvin Tromp di AVP Nunca a yama reunion di 6 minuut riba castigo pa abusadonan di mucha

Melvin Tromp di AVP Nunca a yama reunion di 6 minuut riba castigo pa abusadonan di mucha

by Admin
0 comment 52 views

 

 

E cambio di ley pa loke ta castigo minimo cu  a wordo priminti pa prome minister Evelyne Wever Croes cu su gobierno lo a cambia esaki den un reunion di 6 minuut di duracion, ainda no a tuma luga y vocero di partido AVP, sr Melvin Tromp ta mustra cu por compronde di con esaki ainda no a tuma luga.

Segun sr Tromp, esaki no ta e unico promesa di prome minister cu e no a cumpli cune pa cu pueblo di Aruba, ya cu tin cantidad di otro promesanan haci cu nunca e mira luz di dia, pa colmo su gobierno a haci net lo contrario.

“Aruba ta pasando den un situacion sumamente incomodo na e momentonan aki, caminda mas y mas ta Sali na cla casonan di abuso di menornan di edad, hasta tin un aumento drastico di e casonan aki registra y cu ta mustra cu e gobierno actual, practicamente no a haci net nada cu loke el a priminti di soluciona.

Pueblo a corda con partido MEP a mal usa morto tragico di dos criatura pa trata di saca bentaha politico y cantidad di promesa a bin dilanti, cantidad di plannan a wordo hinca den otro ya cu a wordo sigura na pueblo cu gabinete Wever Croes tin e hende central y lo actua mesora.

Faltando algun luna pa cumpli dos aña na poder ainda nos por ripara cu ningun promesa a wordo cumpli, e ley cu lo a wordo cambia den 6 minuut no ta riba agenda di e gobierno of fraccion cu ta sostene e gobierno pa wordo trata  y practicamente ta reina un silencio hermetido rond di esaki.

A hinca un plan social den otro, a pone miyones un banda pa ehecucion di e plan aki y a lanta dferente comision pa atende cu e desaroyo social riba nos isla, pero te ainda pueblo no por mira algo concreto cu ta wordo haci a base di e plan misterioso aki.

Ultimo simannan tin mas caso realmente tristo di abuso di criaturanan inocente ta sigui bin dilanti caminda tin gruponan den comunidad ta sigui boga pa gobierno actua, gobierno haci algo pa yuda proteha muchanan inocente.

Sinembargo ainda e reunion di 6 minuut no a tuma luga y por lo pronto esaki lo no tuma luga tampoco  ya cu gritonan cu a wordo haci ora cu MEP tabata den oposicion, awe nan mes a lubida riba e promesanan aki.

Sinembargo tin diferente indicacion cu por splica e pasividad di e partido geel y su prome minister ya cu rond di e propio ministernan, rond di miembronan di e fraccion geel, tin varios caso cu a bin dilanti na varios ocasion cu lo tin di e hendenan aki cu tambe a haci nan mes culpabel na baso di pedofilia.

Aunke cu na varios ocasion mi persona y otro hendenan a haci mencion di esaki, nunca prome minister a interveni y a base di su vision pa loke ta integridad, a tuma un of otro medida contra di e hendenan aki.

Na varios ocasion mi persona a reta e lider di fraccion di MEP, Rocco Tjong pa publica un decision di corte contra di su persona loke te dia di awe e no a haci mientras cu a haci mencion di otro casonan cu tampoco a wordo atendi of regla.

Ta mas cu claro cu prome minister no ta interesa pa yama e reunion di 6 minuut pa atende cu loke el e priminti pueblo di haci, esta pa fiha un castigo minimo pa esunnan cu ta abusa di menornan di edad.

Ora cu analisa henter e situacion aki tin cu bisa cu e palabra integridad ora cu e toca miembronan di partido MEP den gobernacion, simplementa ta haya un otro nificacion y esaki no ta conta pa e hendenan aki.

Pueblo ta wordo neglisha pa loke ta maneho social pa loke ta e tema delicado aki pero tin cu bisa cu gabinete Wever Croes a neglisa pueblo riba tur tereno, hasta esun financiero, labor, cuido medico, enseñansa faltando respet pa pueblo tin tur sentido di palabra,” Melvin Tromp di partido AVP a mustra.

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio