Prome Minister Evelyn Wever-Croes a expresa su satisfaccion con e reunionnan den conhunto cu Embahador di Reino y Premier di Corsou Eugene Rhuggenaath, a bay dialuna y diamars na Washington. E mandatario a atende un total di 16 reunion cu e ta considera di tawata sumamente fructifero. Tres tema importante cu a wordo cubri ta: E situacion na Venezuela; Refineria; y Desaroyo Economico.
E SITUACION NA VENEZUELA:
Tocante e situacion na Venezuela y e situacion humanitario, e Premiernan a reuni cu; representante di USA International Development Agency (USAID), señora Bonnie Glick; cu representante di State Department sr. Elliott Abrams; Under Secretary di State Department señor David Hale; Secretario General di Organization for American States (OAS) señor Luis Almagro; Deputy National Security Advisor. Temanan trata tawata e crisis di Venezuela y e efecto cu esaki tin riba nos paisnan; e tema humanitario; tema di salud; tema di siguridad. Prome Minister a duna di conoce cu di e reunionnan aki a ricibi hopi informacion y palabracionnan importante a wordo haci con pa sigui den e tereno aki y unda di parti di administracion Mericano por yuda den e retonan aki.
REFINERIA:
E reunionnan pa atende cu e tema di refineria a tuma luga na State Department como tambe separadamente na OFAC y finalmente a reuni tambe cu Under Secretary of Treasury señor Sigal Mandelker riba e tema di licencia cu Citgo a haya recientemente. Aki Prome Minister ta indica cu a bin mas claridad riba e licencia aki cu internamente lo wordo discuti y analisa intensivamente prome cu defini e siguiente paso cu Gobierno lo tuma. Informacionnan nobo a wordo treci dilanti cu Gobierno no tawata tin prome. Tambe, a haya indicacion cu e informacionnan cu Citgo a duna no tawata completamente corecto.
“Mi kier tuma tempo pa internamente na un forma responsabel evalua tur informacion prome cu defini e siguiente pasonan. E bon noticia cu a sali afo ta cu si Aruba mes tuma over e refineria y especialmente e terminal, e ora lo no tin problema cu OFAC pa esaki. E problema di refineria nos no por a solucione ainda, pero nos ta riba e bon caminda si”, Prome Minister a enfatisa.
DESAROYO ECONOMICO:
Reunionnan cu Camara di Comercio na Merca y cu varios grupo di Banco Mundial (World Bank) pa yuda nos riba e tema di desaroyo economico di nos pais tambe tawata hopi fructifero. Prome Minister a presenta e vision economico cu Minister di Economia y Gobierno di Aruba a presenta recientemente. Ambos instituto a keda hopi interesa. A haci varios contacto pa sigui negosacionnan y pa hunto busca inversionistanan pa inverti den nos economianan di Aruba y Corsou.
Aparta tambe a reuni cu ‘Doing Business Team’ di Banco Mundial, cu tin un proyecto hopi interesante pa yuda paisnan haci nan sistema mas facil y agil. Esaki lo ta un gran beneficio pa comerciantenan haci negoshi na Aruba. Pa lanta un negoshi y tur e burocracia con pa atende cu negoshi. Esaki na Aruba ta un reto cu ta wordo atendi cu n’e. A haci cierto palabracionnan tambe riba e topico aki.
Finalmente, a haci un bishita na congreso pa reuni cu algun miembro di congreso caminda a bolbe trece dilanti e efecto y impacto cu e crisis migratorio tin pa Aruba y Corsou. Comprension di parti di Congresistanan Mericano a wordo demostra pa cu e tema aki.
“Mi ta mira atras riba dos dia di trabou sumamente intenso pero tambe sumamente fructifero y positivo. Indudablemente e hecho cu nos a haci esaki hunto cu Corsou a duna mas forsa tras di e informacion y preocupacionnan cu nos a trece padilanti. Esaki tambe a haci nos trabou en conhunto na Washington mas exitoso”, Prome Minister Evelyn Wever-Croes a finalisa bisando.