ORANJESTAD – Premier Evelyn Wever-Croes ta mira atras riba un biahe hopi intensivo, pero hopi satisfactorio. Durante dos dia di trabou a hiba varios reunion, cu e tema central “crisis di Venezuela y e impacto riba nos islanan”, hunto cu Premier Eugene Rhuggenaat di Corsou.
“Ta importante pa den Gobierno Mericano nan ta consciente cu nan decisionnan tin un impacto grandi riba nos pais. Aruba tin su retonan grandi. Nos a hereda un problema financiero gigantesco, un economia stagna, un explosion social serio y aparte di tur esaki nos mester enfrenta retonan cu tratado y obligacionnan internacional ta trece cu ne. Nos Gobierno ta haciendo su maximo esfuerso pa atende cu tur esaki. Ta dificil pa maneha un pais cu tur su retonan, y ainda mester maneha impacto di crisis den otro pais, cu nos no a ocasiona, pero cu ta impacta nos si. Y nos mester maneha tur e retonan pa evita un crisis den nos pais tambe y pa tene nos ciudadanonan trankil. P’esey e reunionnan aki tabata asina importante” segun Premier Evelyn Wever-Croes.
A atende reunionnan cu entre otro Bonnie Glick, Deputy Administrator na US AID, riba e situacion humanitario na Venezuela. Premier Wever-Croes a splica e impacto den nos pais y nos lo explora con nan por yuda nos alivia e situacion.
A reuni tambe cu sr. Elliott Abrams, Special Representative Venezuela Na State Department riba e impacto di e situacion na Venezuela riba nos pais y e ultimo desaroyonan.
Tambe a reuni cu Luis Almagro, Secretario General di OAS, Organisation of American States cu ta hunga un papel importante den logra un transicion pacifico na Venezuela. A hiba conbersacion di e esfuersonan di OAS den esaki y kico mas por spera.
A reuni tambe cu Under Secretary of State David Hale cual a yuda pa estrecha e lasonan entre Aruba, Corsou y Merca. David Hale a reconoce y gradici e Gobiernonan di Aruba y Corsou pa tur loke nos paisnan ta haciendo den atende e presionnan di e crisis di Venezuela. Nan a reuni tambe cu Deputy National Security Advisor Charles Kupperman riba e riesgonan den siguridad cu un migracion masal sin presedente.
Den e reunionnan por a nota hopi comprension di parti di e autoridadnan Mericano y nan disponibilidad pa yuda Aruba y Corsou.
KICO TA SIGUIENTE PASO?
“Mi siguiente paso ta pa bay Hulanda tambe fin di luna pa atende e tema importante aki. Mi lo delibera cu Premier Rutte y cu Staatssecretaris Knops riba e impacto grandi di e crisis riba nos pais.
Tambe mi lo reuni cu e comision di Reino den Eerste y Tweede Kamer riba tres topico: Venezuela, integridad y finansas publico. Ta importante pa nan scucha di mi con e situacion ta y unda nan tambe por yuda.
E impacto di e crisis di Venezuela riba nos pais ta hopi grandi, y ta hopi importante pa Parlamento y Gobierno hulandes tambe ta na altura di esaki.
E crisis di Venezuela no ta un crisis di un pais of un region so mas. E ta un crisis mundial. Aruba ta un di e paisnan cu ta wordo afecta mas severamente y sin cu nos ta haya ayudo financiero di ningun banda. Ta momento pa Reino y pa comunidad mundial comparti e peso aki. Nos so no por carga esaki mas den nos region”, segun premier Evelyn Wever-Croes.
