“Awe, riba Dia Internacional di Famia, ta un bon momento pa para keto y reflexiona riba e significacion di un nucleo familiar. Desde chikito nos a siña for di e nucleo familiar entre otro nos norma y balornan cu ta e base pa forma nos caracter. Como un hende cu pa hopi aña a traha den Fundacion Pro Famia Feliz, cua fundacion ta traha na bienestar di famianan na Aruba, mi sa con importante e fundeshi familiar ta y tambe mi sa cu ora cu e fundeshi familiar no ta bon ni solido, cos por bay robes”.
Parlamentario Setty Christiaans-Yarzagaray, na ocacion di Dia Internacional di Famia, ta haci un peticion na pueblo di Aruba, pa nos para keto riba e bida familiar y pensa con nos ta guia nos muchanan y hobennan. Na mayornan, para keto y evalua si e forma cu ta guiandao nos yiunan ta e forma con nos kier hiba famianan den comunidad. Yiunan, purba reflexiona y comprende cu mayornan no ta haya les cu ta siña nan con pa ta mama y tata. E conocemento aki ta wordo forma durante bida como mayor. Como famia, nos tur hunto mester dedica tempo na otro den famia. Mayornan dedica tempo na e yiunan y yiunan dedica tempo na mayornan. Laga nos tur siña di otro. Hunto nos ta forma un famia.
Feliz dia di Famia.