Dialuna y diamars, Prome Minister ta na Washington Merca pa un Mision Conhunto cu Embahador di Reino na Washington, sr. Schuwer a organisa. Prome Minister di Corsou Eugene Rhuggenaath hunto cu su delegacion y Prome Minister di Aruba Evelyn Wever-Croes hunto cu su delegacion lo compaña e Embahador di Reino na algun reunion durante e dos dianan aki. Riba agenda tin varios reunion cu tin como punto central tanto e refineria como tambe e impacto cu e crisis migratorio di Venezuela tin riba Aruba. Lo reuni cu OFAC cu ta esnan cu ta atende cu e sanccionnan y tambe cu State Department tanto riba e topico di sanccionnan como riba e situacion di e crisis humanitario en general.
Na Capitol Hill tambe lo tuma luga reunionan cu congresistanan Mericano unda cu lo enfatisa tambe e importancia di e impacto di e refineria y e impacto di e crisis migratorio tin riba economia di nos paisnan. Prome Minister a enfatisa cu ta importante pa nan realisa cu cada decision cu nan tuma aya tin su impacto grandi riba e islanan chikito manera Aruba y Corsou.
Lo reuni cu Camara di Comercio na Washington y lo topa cu varios inversionista potencial pa deliberia riba e oportunidadnan economico cu e islanan tin di Brinda.
Tambe lo tin algun encuentronan entre otro cu IMF y WorldBank na unda tambe lo trata e tema di Venuela y su impacto pa mira con Aruba por bin na remarke pa mas fondo pa yuda nos cu e problematica aki.
Lo reuni cu Secretario General di OAS sr. Almagro riba topico di Venezuela. E situacion hunanitario lo wordo trata cu administrador di US AID, tambe cu representante especial di Venezuela na State Department, y cu Under Secretary Hale na State Department. E aspectonan di siguridad lo wordo trata cu oficina di National Security Advisor.
E prome reunionnan a cuminsa tempran mainta y lo bay ta hopi intensivo riba e diferente areanan menciona. Prome Minister lo ta bek na Aruba diaranson cu e speransa di trece bon noticia bek pa nos pais.
Un bon reunion cu sr. Elliott Abrams, Special Representative Venezuela na State Department riba e impacto di e situacion na Venezuela riba nos pais y e ultimo desaroyonan. Y con State Department por yuda nos cu alivia e sanccionnan di OFAC.
Reunion cu Bonnie Glick, Deputy Administrator na US AID, USA International Development Agency riba e situacion humanitario na Venezuela. Prome Minister a splica e impacto den nos pais y lo explora con nan por yuda nos alivia e situacion.