Parlamentario Endy Croes durante conferencia di prensa e siman aki a amplia riba e problematica den operacion di Hospital unda Croes a splica cu ta tempo pa Directeur y Top di Hospital entrega nan retiro pa haci un schoonship den hospital pero tambe a bay mas den detayes riba e ley di AZV. Segun Parlamentario Endy Croes, ley di AZV lo bira un topico di debate hopi interesante y no ta tur ora tur stakeholders ta dispuesto pa debati cu argumento riba e ley aki pero ta necesario pa nos inicia e debatenan alrespecto. Pueblo a scoge un Parlamento # 10 yena cu curashi pa por trece e cambio.
Cambio den e ley di AZV
AZV simplemente ta costando pueblo di Aruba demasiado placa y si no bin cambionan radical den e ley, aki poco tempo AZV lo “crash”, segun Endy Croes. Cifranan no ta gaña y si no haci nada pa e sostenibilidad di AZV pronto AZV lo bati na porta di gobierno pa mas Landsbijdrage cual ta ancra tambe den ley. Un ehempel, na aña 2010 AZV a gasta 330 miyon na cuido y gobierno mester a paga 123 miyon como landsbijdrage y Aruba no tabata conoce BAZV na e momento ey ainda. Na aña 2017 AZV a gasta 400 miyon na cuido mientras BAZV a trece aden 135.5 Miyon y gobierno mester a contribui cu un landsbijdrage di 28.8 Miyon. Pues den 8 aña cuido tambe a aumenta cu 70 Miyon y pronosticonan ta cu esaki lo sigui aumenta cu un averahe di 4% pa aña. Pues no necesariamente sigui aumenta BAZV lo trece un solucion si no cambia e ley y haci ehercisionnan pa baha gasto sin mishi cu e calidad di cuido.
Rentenier y LTU
Di banda di AZV nan a contracta un compania Hulandes pa haci un ‘indebt forecast study’ pa haya un bista riba diferente componente y sostenibilidad di AZV. Parlamento ta anticipando cambio riba entre otro art 3 onderdeel 1 di e ley y mas dilanti lo splica mas detaya. Tambe renteniernan kendenan ta cumpra un cas na Aruba ta haya derecho di un verblijfsvergunning door cu nan a inverti un suma y manera nan inscribi na Censo nan ta haya derecho riba AZV. Muy probablemente e ley di AZV cu lo bay wordo revisa mester trece cambionan tambe den LTU, entre otro artikel 7 y 8 cu ta cubri parti di esakinan.
Haci nada no ta un opcion
Tambe lo bay mira mas critico momento di duna permiso na un empleado pa bin traha pa por tin un medische keuring basta mas amplio pa asina por garantisa cu ta treciendo un persona completamente bon di salud. Asina tin hopi cambio mas cu lo mester bin pa purba salvaguardia fondonan di AZV na tempo garantisando esaki pa futuro. Parlamentario Croes ta kere fervientemente cu debatenan y argumentonan sano hunto lo logra e promer pasonan den 2019. Parlamentario Endy Croes ta termina bisando cu haci nada no ta un opcion. Mike Eman y AVP a laga Aruba total loss, esta “na werki” y ta nos deber pa drecha nos pais pa nos futuro generacion.