ORANJESTAD, Aruba – Durante un rueda di prensa na Aruba Bank organisadornan Mark-Benson Denz (Infinity Media) y Diederik Kemmerling (The Lab) hunto cu e partnernan di evento Aruba Bank y Digicel Business Solutions a anuncia tur detaye di e di 4 ‘E-Aruba Business Seminar’. Esaki lo tuma luga ariba diasabra 8 di Juni 2019 den Renaissance Convention Center pa 9’or di mainta. Ta trata aki ya caba di e 4 edicion cu lo trece varios orador internacional for di companianan manera Google, Youtube, McDonald’s pa comparti nan conocemento y tips riba diferente area importante di negoshi.
Cualkier persona cu ta activo den mundo di mercadeo, communicacion y/of empresarial sigur lo a atende un of mas edicion di e seminario. E exito di seminario ta pa constantemente trece topiconan y oradornan di tendencianan actual. Tambe e ultimo añanan por mira cu e produccion di e evento a subi na un nivel internacional. Esaki ta haci’e atractivo pa por presencia un evento di tal magnitud cu ta combina ‘intercambio di conocemento’ cu un tiki entretenimento.
Algun di e oradornan pa e evento pa e edicion di 8 di Juni proximo lo ta di e compania Google Maciej Szczepaniak. for di e compania Facebook Mario Latham, for di Youtube y Insights Augmented Consulting Saina Shelton y for di McDonald’s Natalia Pelaez Gomez. E oradornan lo papia riba mercadeo digital cu un focus riba Infuencer Marketing, Video Marketing, Innovacion, Con pa mantene bo negoshi ‘up to date’ cu e mundo cu ta evoluciona diariamente etc y hopi mas.
Ya caba por mira un interes grandi di companianan pero tambe di individualnan cu kier mehora nan mes riba e diferente topiconan cu lo wordo discuti pa cumpra carchi. Esakinan ta obtenibel na SuperFood y tambe riba internet via e website www.e-aruba.com.
Aruba Bank y Digicel Business Solutions mescos cu aña pasa a uni nan mes na e evento aki mirando e importancia pa Aruba sum undo empresarial keda inova y haya tipsnan con pa haya mas benta y of con pa opera na un forma mas inovativo usando tecnologia. Tanto Aruba Bank como Digicel ta companianan cu tin tecnologia como un parti importante den nan strategia y pa e motibo aki e seminario aki ta un match ideal pa e companianan aki.
E-Aruba Business Seminar ta un produccion di Infinity Media Aruba y The Lab. E evento ta Powered by Aruba Bank y Digicel Business Solutions cu un aporte di Aruba Airport Authority, Renaissance Aruba Resort, BENU Pharmacy, Click Print, Sommer Web Architect y Elite Productions.