En connexion cu celebracion di siman di enfermeria na Aruba, Rotaract Club of Aruba ta percura pa un regalito di aprecio na tur enfermera cu ta labora na San Pedro di Verona Paviljoen (S.A.B.A.) Oranjestad.
Tur aña riba e fecha natal di Florence Nightingale, un dama cu ta wordo considera e persona tras di e modelo moderno di enfermeria, nos ta celebra tur persona cu ta labora den e profesion aki. Na Aruba nos ta extende e celebracion durante ful un siman den luna di mei pa asina percura cu tur enfermera ta ricibi nan aprecio. E trabou di enfermera ta uno pisa pero bunita na mes momento. E ta rekeri cu bo ta traha oranan largo y iregular mientras ta e persona cu tey pa tur cu ta pasando den tempo dificil cu nan enfermedad.
Rotaract Club of Aruba a den pasado a yega di organisa varios proyectonan pa nos grandinan cu ta keda na San Pedro Paviljoen y desde e tempo ey a keda den connexion estrecho cu e organisacion. Durante e proyectonan aki ta unda miembronan a mira di serca con duro y cu amor e enfermera y enfermeronan ta eherse nan trabou tur dia. Aunke e aña Rotario aki no a organisa un evento cu S.A.B.A., toch a tuma e oportunidad pa duna aprecio na tur enfermeronan cu ta labora na San Pedro Paviljoen. E team di Rotaract a diseña un tas den material di canvas reusabel y a paketa esaki hunto cu un cuki unico cu detaye di enfermeria. Riba e tas aki ta scirbi “mi ta un nurse cu hopi curazon pa mi trabou”.
Diabierna ultimo presidente di club, Ryon Dijkhoff, hunto cu miembro Stephanie Boekhouwer a parti e regalito aki na e ekipo presente. Esaki tabata un sorpresa pa e team cu a laga un sonrisa riba nan cara. Tin cu remarca cu asta tabata tin un enfermera ta cana rond cu su regalo di 3 aña pasa, un mug cu diseño di Rotaract. Alabes, a entrega e tasnan aki na 3 miembro di Rotaract club cu tambe ta labora den e sector di cuido curative aki cual ta Gianina de Freytas, Carolyne Geerman y Alexandra Brown.
Rotaract Club of Aruba kier gradici Ivy pa inicia e Proyecto chikito aki, na Vice President Diantha Boekhouwer y tur miembro y boluntario cu a yuda prepara e regalonan. Tambe kier gradici tur sponsor y pueblo di Aruba henter cu ta contribui na nos eventonan di fundraising. Asina aki ta percura cu e club tin fundo pa proyectonan manera esaki.
Por ultimo, Rotaract Club of Aruba kier felicita tur enfermero/-a pa cu dia internacional di enfermeria.