E impacto di e crisis Venezolano riba nos pais, y e tema di asilo politico a haya hopi atencion siman pasa. Durante un conferencia di prensa di un ora Gobierno a contesta hopi pregunta y a pidi tur hende pa no bay den panico, pa keda cabes trankil pa asina Gobierno por tin espacio pa atende cu tur e retonan di e crisis aki. Gobierno tin e retonan aki di asilo bou control. Gobierno tin e proceduranan ‘in place’ y ta ganando e casonan den Corte. Ta pesey tambe a reuni cu General de Vin di Marina Real pa intensiva e cooperacion y e esfuersonan pa tene nos costanan miho proteha. Nos ta prepara pa cualkier eventualidad. Y ta p’esey na fin di siman mester a cera e frontera, despues cu Venezuela a habri e frontera cu Aruba.
– Gobierno a continua cu reunionnan cu sindicatonan TOPA, SADA, SPA, SIMAR, y SEPPA riba diferente tema. Reunion a bay den bon ambiente y lo continua proximamente.
– Gobierno a presenta e proyecto “From Good to Great”, un proyecto pa guia nos hobennan, y motiva nan pa nan ta exitoso den bida. Den e prome 6 luna di e proyecto 250 alumno di 9 scol a participa y den e siguiente 6 lunanan nos lo inclui 250 hoben mas.
– Esfuersonan di Gobierno pa sigui ataca abuso sexual di mucha ta continua. Fundacion Lisette Gomez cu tin casi 10 aña ta lucha riba e tereno aki, den un manifestacion pacifico a presenta na Gobierno e diferente manifesto y rapportnan cu el a entrega den pasado na Gobierno anterior pero cu e Gobierno aki nunca a ricibi pa motibo cu no tabata tin traspaso debido di informacion. Gobierno di Aruba lo traha hopi di cerca cu sra. Lisette Gomez riba e problema serio di abuso sexual di mucha. Hunto lo traha riba prevencion y riba e castigonan mas halto.
– A tuma luga na Aruba conferencia internacional tocante oceano organisa pa Unesco Aruba, despues a sigui e encuentro intergubernamental cu delegacion di hopi pais di Intergovernmental Oceanographic Commission region Caribe, cu presentacion di Bucuti Tara Resort como ecofriendly enterprise.
– Dialuna y diamars a tuma luga pa prome biaha e nationale toets pa tur alumno cu ta den klas 6 di scol primario, pa garantisa cu cada mucha ta haya e tipo di scol avansa cu e merece.
– Colegio Conrado Coronel a planta dos mata como inicio di un proyecto di plantacion na scol den colaboracion cu Santa Rosa. Diabierna mainta Ministernan Chris Romero y Rudy Lampe y un delegacion di Santa Rosa, a sorpresa Colegio Conrado Coronel pa asina anuncia oficialmente cu nan scol a sali ganador di e proyecto Hofi Amistad. Masha pabien na Colegio Conrado Coronel.
– EPI a organiza un dia special dedica na e Siman di Enfermeria pa motiva studiantenan di enfermeria.
– Olimpiada Escolar ta un realidad bek despues di 8 aña, y tur alumno, mayornan, famianan ta wordo invita pa e apertura oficial di Olimpiada Escolar dia 24 mei na Compleho Deportivo Guillermo Prospero Trinidad. Gobierno kier stimula y promove deporte y di e manera aki ta compromete su mes pa haci’e.
– E di 29 edicion di Conferencia Anual di Turismo CATA 2019 a wordo teni na Aruba. Un conferencia importante pa nos turismo cu a conta cu presencia di varios partner, aerolineanan y agentenan di biahe di latino america.
– Siman pasa tabata e siman di enfermeria. Minister Oduber den nomber di Gabinete Wever-Croes a gradici tur enfermero y enfermeranan pa e gran labor cu nan ta haci pa nos pais.
– Gobierno/RDA a absorba subida di prijs di gasoline na april completamente y na mei parcialmente. Na april y juni prijs di gasoline no ta subi. E subida di 11,8 cent na mei ta pa cubri e subida di 3 luna, esta april, mei y juni, cu eigenlijk mester tabata 30 cent. Gobierno/RDA a absorba e diferencia. Awor ta bay calcula prijs di benta di gasoline na un otro forma, teniendo na cuenta e prijs di compra riba mercado internacional combina cu e reserva di producto almacena pa RDA/FMSA. Cu esaki Gobierno ta spera di por yega na un prijs di benta di gasoline na un manera mas beneficioso pa Pueblo.
– Reunion cu Aduana y ehecutivo di e sistema computerisa aduanero Asycuda riba funcionalidadnan cu por yuda haci e trabou aduanero mas eficiente na beneficio di comercio na Aruba.
– E poeta Clarette Quandus an entrega e buki ‘Kibrando e silencio’ na Minister Xiomara Ruiz-Maduro. Gabinete Wever-Croes ta duna realse y e debido respet na poetanan local.
– Siman pasa a tuma luga un reunion cu e artista Maria Teresa Madariaga riba e buki conmemorativo cultural di 40 aña di servicio cultural door di Departamento di Cultura. Un buki den cual nos por haya informacion di nos artistanan local. E compilacion di e buki ta den fase final y pronto lo keda presenta na Pueblo di Aruba.
– Den un encuentro publico cu Parlamento di Aruba, Minister Andin Bikker a elabora entre otro riba e situacion caminda nos isla ta wordo confronta cu varios caso di uzo indebido di aplicacion pa asilo politico, y e pasonan concreto cu ta wordo tuma pa frena e desaroyo preocupante aki, entre nan e intencion pa introduci e asina yama “Schipholmodel”, caminda lo evalua e peticionnan di asilo rapidamente y mientras lo por retene aplicantenan durante dicho periodo den cuadro di screening pa siguridad, orden y salubridad publico.
– E Minister a elabora tambe riba cambionan cu a wordo haci den ley di LTU entrante december 2018, y cu tin pendiente pa wordo haci den e Toelatingsbesluit, entre otro pa introduci Advanced passenger information system (APIS) y Passenger name registration system (PNR), cual sistemanan lo aporta pa screen pasaheronan di antemano den cuadro di siguridad y pa entre otro evita cu por ehempel personanan ta purba drenta Aruba bow pretencion falso di bishita como turista, caminda cu nan intenshon real ta pa purba permanece aki sin un titulo debido. Tur esaki cu e meta di haci Aruba mas sigur.