Home Lifestyle IBiSA ta informa: Campaña ‘Kico ta e Big Deal. Midi bo...

IBiSA ta informa: Campaña ‘Kico ta e Big Deal. Midi bo presion awo’ en conexion cu Dia Mundial di Presion Halto

SHARE

 

 

Dia Mundial di presion halto ta wordo celebra tur aña dia 17 di mei. Meta di esaki ta pa pone atencion di publico riba importancia di prevencion y complicacion di un presion mucho halto. Tur aña ta scoge un tema cu lo dedica atencion na dje. E tema di Organisacion di Salud Mundial pa algun aña caba ta: ‘Sa bo numbernan’ (know your numbers). En conexion cu e cifranan alarmante di presion halto IBiSA a scohe pa su campaña di presion halto pa 2019, e lema: ‘Kico ta e Big Deal. Midi bo presion awo’

 

Segun estadisticanan di Gezondheidsonderzoek Aruba 2016/2017, aproximadamente 9 di cada 10 persona (riba 20 aña) cu a participa na e encuesta aki, tin un presion arterial eleva (presion sistolico 121-139 y/of presion diastolico 81-89) of halto (presion sistolico 140 bay ariba y/of presion diastolico 90 bay ariba). E cifranan aki ta hopi alarmante. Cifranan pa hende homber ta 7 di cada 10 tin un presion arterial halto. E hende muher no ta keda leu. E cantidad ta 6 di cada 10 tin un presion arterial halto.

 

Pa e motibo aki IBiSA conhuntamente cu Ministerio di Turismo, Salud y Deporte, Departamento di Salud, AZV, Wit Gele Kruis, Hospital Dr. Horacio Oduber, SVb, Fundacion Movemiento ta Bida, Fundacion CVA, Kidneys297, Transition2Health, Botica Aloe, Benu Pharmacy y Botica di Servicio a uni forsa y ta bin cu diferente actividad pa e siman aki. E campaña lo core di dia 13 di mei pa dia 8 di juni caminda ta finalisa e compaña na e Aruba Health Fair di AZV.

Di e forma aki nos ta manda e mensahe pa check presion di sanger y haci cambionan necesario na bo sistema di biba y come.

 

Actividadnan planea pa publico pa e campaña ‘Kico ta e Big Deal. Midi bo presion awo’ ta:

Dianan 13 te cu 17 di mei di  8:00 am pa 12:00 pm: chekeo gratis di presion, sucu y colesterol na diferente botica di Benu Pharmacy.

Dia 15 di mei pa 2:00 pm: Training gratis pa personanan cu tin nan mesun mashin di presion y cu kier siña traha bon cu esaki. Trese bo mashin de presion na IBiSA na Frankrijkstraat.

Dia 18 di mei di 8:00 am pa 12:00 pm Screening di Salud na Club Sportboys di Fundacion CVA.

 

Programa di screening gratis di presion di Team di Salud di IBiSA en conexion cu e campaña ‘Kico ta e Big Deal. Midi bo presion awo’ ta riba e siguiente fechanan for di 9’or di mainta pa 3’or di atardi:

Dia 27 di mei na Pricesmart.

Dia 28 di mei na New Food Center na San Nicolas.

Dia 29 di mei na Superfood.

Dia 3 di juni na Hulp Bestuurskantoor na San Nicolas.

Dia 4 di juni na MFA Savaneta.

Dia 5 di juni na MFA Sta. Cruz.

Dia 6 di juni na MFA Paradera.

Dia 7 di juni na MFA Noord.

 

IBiSA ta invita henter pueblo di Aruba pa haci bon uzo di e oportunidad aki.