Diabierna tempran Gobierno di Aruba a tuma nota di declaracion di Vice President di Venezuela kende a indica cu Venezuela a dicidi di habri frontera cu Aruba. Tambe el a menciona cu no ta habri frontera cu Corsou y Boneiro. Prome Minister Evelyn Wever-Croes a expresa cu pa Gobierno e decision aki a cay como un sorpresa y ta poco straño, dicon Aruba si, y por ehempel Boneiro y Corsou no.
“Mesora nos a bay den consulta interno, cu embahada di Reino na Caracas y cu Hulanda, pa por haya un confirmacion di locual a wordo declara na television. Mirando cu ta trata di un tema asina delicado, cu hopi consecuencia, nos como un Gobierno serio, no por actua a base di un declaracion na television. Nos ta wardando pues confirmacion di Gobierno di Venezuela pa despues nos fiha nos propio pasonan”, Prome Minister a duna di conoce.
Prome Minister a indica cu mientras tanto e situacion ta keda mescos, avion ni boto por bin for di Venezuela. E mandatario ta haci un apelacion na pueblo di Aruba pa keda trankil. Gobierno di Aruba ta manehando e situation y lo informa comunidad si tin cambio den e situacion.