Parlamentario Endy Croes a tuma nota cu e ley di LAFT a yega Parlamento. Desde november 2018 Parlamentario Endy Croes a cuminsa cuestiona e manera cu Hulanda ta atrapa leynan di Aruba. Parlamentario Croes a ilustra na varios ocasion cu e politico Henk Kamp a wordo nombra pa Hulanda contra ley. Ley di LAFT ta splica hopi cla den artikel 4 lid d cu un persona cu a yega di aparece riba un lista politico no por wordo nombra ni por tin un funcion den CAFT. Henk Kamp tabata riba lista di VVD y a cubri diferente funcion como politico entre otro desde 2012 pa 2017 Minister di Economische Zaken. Henk Kamp mes ta e minister encarga tambe pa e desaster na Groningen alrespecto ‘aardgas’ cu ‘aardbevingen’ cu a causa daño na masha hopi cas y awor tin MIYONES di claim y pronto lo bay tin un encuesta Parlamentario riba e tema aki.
Ley di LAFT a duna CAFT bida
Hulanda poniendo hopi presion riba ‘ondeugdelijkheid van bestuur’ y e maneho desastroso di Mike Eman a logra haña Mike Eman y AVP na rudia dia 27 augustus 2015 unda Parlamentarionan di AVP a aproba un ley di LAFT yena cu erornan contra nos constitucion. E ley di LAFT aki a duna CAFT bida. Netamente CAFT a habri e cranchi pa e coruptonan di AVP manera Mike Eman, Benny Sevinger y Bermudez desgracia finansas publico di Aruba. Pasobra ta cu presencia y supervision di CAFT nos debe nacional a sigui aumenta desde 2015 y a alcansa 90% di nos GDP y nos debenan a redobla surpasando 4 BIYON florin y pago di interes di pais Aruba a alcansa 230 MIYON florin pa aña. Tristo pueblo pero esaki ta e realidad di e bon trabao y ainda falta cu CAFT y AVP a haci pa Aruba.
Brevet van onvermogen
Evelyn Wever Croes sinembargo supervisa pa un CAFT manca y ilegal, esta un CAFT cu presencia di Henk Kamp a logra cera aña 2018 budget neutral y no mester a presta ningun extra placa manera tabata e caso di ultimo 8 añanan di Mike Eman y AVP. Pues Evelyn ta score un dikke voldoende y CAFT sigur ta haña un brevet van onvermogen. Awor lugar Hulanda reconoce e eror di CAFT y tambe su mesun eror cu e nombracion di CAFT, Hulanda a coy un postura pa bringa pa corigi nan eror pa cu e nombracion di Henk Kamp den CAFT. Hulanda luna aden luna afor unico cambio cu nan kier mira ta cambia e ley pa acomoda Henk Kamp. Segun Parlamentario Endy Croes Hulanda ta pidiendo asilo politico pa Henk Kamp y ta presionando gobierno pa cu esaki. Hulanda a kere kisas cu asina e por domina e poder legislativo?
Cu cual linial Hulanda ta midi?
Hulanda a kere cu e ta deal cu stempel Parlament? Hulanda ta kere cu ta e entreguistanan Baba Herde, Donkey Tromp, Clarisa Velazquez, Marlon Sneek, Norma Varlack, Desiree Croes ta den Parlamento? Hulanda no ta mira cu Parlamento # 10 ta uno serio y ta corigiendo erornan di pasado? Hulanda no ta contento cu e Parlamento aki lo bay pasa e ley di Integridad pa drecha cos? Hulanda no ta kere den democracia? Pa Hulanda cambio den ley di LAFT pa legalisa Henk Kamp ta mas importante cu corigi leynan contra constitucion? Asina importante esey ta pa Hulanda? Cual linial Hulanda ta usando? Jantje bin bij!