Pa varios luna caba Minister Chris Romero, como e Mandatario encarga cu e cartera di Transporte, ta bin ta papiando di e desaroyo di un Fast Ferry cu inicialmente lo conecta Aruba y Corsou. Pa e Fast Ferry por funciona, lo mester desaroya un pier apto pa ricibi y despacha e cantidad di trafico di persona y vehiculo cu lo pasa diariamente entre Aruba y Corsou. Pa por tin un control optimal di e funcionamento di e Fast Ferry, Minister Romero a bin cu e iniciativa pa articula San Nicolas Port Authorities and Development. Na final di aña 2018, Conseho di Minister di Pais Aruba a aproba unanimamente e articulacion di San Nicolas Port Authorities and Development.
San Nicolas Port Authorities and Development lo ta e entidad encarga cu control di e diferente proyectonan cu ta den “pipe-line” pa San Nicolas. Den cuadro di e desaroyonan aki, por bisa cu actualmente e ley pa cu San Nicolas Port Authorities and Development ta den preparacion na e instancianan concerni pa asina e por keda cla pa presenta na Parlamento aki poco tempo. Ta calcula cu e ley lo yega Parlamento di Aruba prome cu reces tuma lugar.
Segun Minister Romero a duna di conoce cu “San Nicolas Port Authorities and Development lo trece un desaroyo economico grandi pa San Nicolas y Aruba. Mi por bisa cu na october 2018 nos a haya aprobacion unanime for di Conseho di Minister pa lanta San Nicolas Port Authorities and Development”. E ta asina cu San Nicolas Port Authorities and Development lo encarga di e diferente otro proyectonan cu lo keda realisa na San Nicolas, cual ta bay man den man cu e Fast Ferry. Di e manera aki Minister Romero ta ratifica su compromiso pa duna San Nicolas e “boost” economico cu tanto ta sclama pa añas y cu ta finalmente mereci.