Durante un debate den Parlamento Hulandes secretario di estado sr. Knops a duna di conoce cu paisnan Caribense di Reino tambe por haci uzo di e “opvang capaciteit” na Colombia. Hulanda a duna Colombia 4 miyon euro pa esaki.
DEBATE DEN 2E KAMER
Riba 23 di april ultimo tawatin un debate den 2e kamer riba e situacion di crisis na Venezuela. Durante e debate aki un miembro di 2e kamer a haci e pregunta si Corsow tambe por hasi uzo di e facilidadnan na Colombia, ora saca Venezolanonan for di Corsow. E contesta di sr. Knops riba esaki tawata cu e personanan no lo mester bay bek semper nan pais, pero esaki por ta den region tambe, es decir Colombia.
PREGUNTANAN POR ESCRITO
Den cuadro di esaki y e hecho cu te dia di awe Hulanda no kier yuda cu recurso financiero e siguiente preguntanan a wordo manda pa Minister di Asuntonan General sra. Mr. Evelyn Wever-Croes y Minister di Husticia sr. Mr. A. Bikker:
- To correcto cu Aruba por haci uzo di e facilidadnan na Colombia, cu Hulanda a yuda subsidia?
- Si esaki ta e caso, nos por wak e plan di Colombia, riba cual Hulanda a basa nan decision? Tin un plan di tal indole ta existi?
- Cuanto capacidad tin asigna pa Aruba na Colombia, riba cual por haci un apelacion?
- sr. Knops a splica cu a duna Colombia ayudo financiero pa yuda cu e “opvang” den nos region. Dicon Hulanda no a brinda Aruba ayudo financiero pa mitiga e situacion aki, cual ta por lo menos similar na esun di Colombia?
- Kico Hulanda lo haci si no por haci uzo di e facilidadnan na Colombia?
- Hulanda ya caba a reacciona riba e peticion di Minister di Husticia, sr. Mr. Bikker, pa introduci visum?
- Si esaki no ta e caso, por informa nos dicon esaki no a sosode ainda?