E situacion di ilegalnan y pidimento di asilo tin pueblo hopi preocupa. Fuera cu pueblo ta preocupa e tema su mes ta basta controversial y confuso. Parlamentarionan di POR atraves di Presidente di Parlamento, a hasi uzo di nan derecho pa invita Minister di Husticia pa acudi na Parlamento den un openbare bijeenkomst (encuentro publico) pa duna splicacion y cuenta tocante e situacion reinante. E parlamentarionan tambe ta desea di scucha cual ta e accionan di parti Gobierno pa trece trankilidad den corto plazo. Dimes tur parlamentario presente lo tin oportunidad pa haci pregunta na Minister di Husticia. E encuentro publico aki lo tuma lugar diahuebs awor pa 2pm. Fraccion di POR ta gradici Minister di Husticia pa acepta e invitacion y pa acudi na Parlamento den un frega di wowo y tambe Presidente di Parlamento door di a pone un fecha a corto plazo pa e reunion aki.