Home Lifestyle Dialuna 6 di mei ta Melanoma Monday

Dialuna 6 di mei ta Melanoma Monday

SHARE
E prome dialuna di mei ta conoci como Melanoma Monday. E meta di Melanoma Monday ta pa concientisa hende riba kiko ta melanoma. Melanoma ta un forma di cancer di cuero cu ta agresivo. E celnan ta reproduci nan mes den lunarnan riba bo cuero y ta bira canceroso y maligno y ta plama hopi liher na otro areanan di bo curpa si bo no trat’e na tempo. Di tur e sortonan di cancer di cuero cu ta existi, melanoma ta esun mas maligno y ta responsabel pa como 75% di tur e mortonan a causa di cancer di cuero.
Melanoma por aparece na diferente area di bo curpa manera bo wowonan, bou di huña y asta den nanishi of den boca. Den pasado a pensa cu melanoma ta un cancer no frecuente, pero durante ultimo añanan cifranan ta mustra cu e casonan di melanoma ta aumentando, segun e American Academy of Dermatology.
Hendenan cu ta hopi den solo, tin mas chens di haya cancer di cuero. Pa e motibo aki ta importante pa bo cuida bo cuero. Melanoma Monday ta pa concientisa hende riba e peligernan di cancer di cuero y pa recorda nos tur cu ta importante pa laga un specialista controla bo cuero regularmente.
Con bo por detecta iregularidadnan den bo cuero trempan? Pa esaki por uza e sistema di ABCDE:
Assymetry: e lunar of moedervlek tin forma straño? Si bo imagina un liña ta pasa mei mei di bo lunar, e ta asimetrico? Si ta asina, ta bon pa laga un specialista tira un bista riba dje y control’e.
Border: e rand di bo lunar ta manera iregular? Si esaki ta e caso, busca asistencia medico.
Color: e color di e lunar ta straño of tin diferente color? Laga check esaki serca un specialista.
Diameter: con grandi e lunar ta? Melanomanan hopi bes tin un diameter di 6mm of mas.
Evolving: si e lunar tin desaroyonan di su mes, manera por ehempel den grandura, color of forma, esakinan ta motibo pa bo bai bishita un dokter. Si bo ripara cu e lunar ta grawata, ta sangra, ta haci dolor of tin pus ta sali afor, tur esakinan ta señalnan cu ta ora pa bo bishita un specialista.
Deteccion trempan ta crucial pa un tratamento exitoso
Mescos cu ta e caso cu tur tipo di cancer, un deteccion trempan ta yuda pa combati e cancer miho. Contrario na otro tipo di cancer, melanoma no ta responde bon tur ora riba chemoterapia, radioterapia of cierto remedinan. Ora detecta melanoma laat of ora cu el a plama bai na otro partinan di e curpa, e posibilidadnan pa tratamento ta limita. P’esey ta importante pa detecta melanoma trempan pa asina tin mas posibilidad pa un tratamento exitoso.
Tips pa cuida bo mes contra cancer di cuero:
No expone bo mes na solo hopi entre 12 pa 3or di merdia
Bisti paña cu ta protehabo contra e rayonan directo di solo y bisti un sombre of pechi ora bo ta bai sali den solo
Uza un bon crema pa protehabo contra solo
Bai regularmente den sombra
No uza un zonnebank/tanningbed. Cada bes cu bo tan un rato den e zonnebank, esaki ta ekivalente na full un dia na lama!
Si bo kier mas informacion riba melanoma of cualkier otro tipo di cancer, bo por tuma contacto libremente cu Koningin Wilhelmina Fonds Aruba na 5820412 of via nos facebook page Koningin Wilhelmina Fonds Aruba. Nos oficina ta situa na Spinozastraat 9, net patras di Watertoren na Oranjestad.