139
Noord: Algo pasa di mey anochi, patruya di Noord ta wordo manda cu urgencia na e crusada di CMB pa un caso cu na prome instante tabata mustra un accident cu herido, den cual chauffeur di un Nissan Sentra lo a hit and run.
Na yegada e polisnan ta topa cu un Harley Davidson benta riba caminda y cu dos persona herida, ambos tabata riba e Harley Davidson. Mesora nan a pidi pa presencia di ambulance, pa atende cu e dos personanan herida.
Poco rato despues, e chauffeur di e Nissan Sentra cu a dal e Harley y a core bay, ta bin bek na e sitio. Mesora polis a bay atende cune, nan a pone supla pa controla si e por tabata bou influencia, pero esaki no tabata e caso, su test a sali cero alcohol.
E motociclista a splica polis, cu e tabata biniendo for di pariba y e Nissan Sentra color cora tabata biniendo di pazuid, e Chauffeur di e Sentra no lo a pone bon tino y a subi caminda sin duna e brommer preferencia.
E impacto tabata na e parti patras di e Nissan Sentra.
E motociclista a keda herida na su rudia, despues cu personal di ambulance a trat’e na e sitio, nan a transporte pa hospital pa un tratamento medico mas avansa.
