Oranjestad: Diahuebs den oranan di atardi, na airport polis ta logra pone man riba dos homber mas cu tabata den posesion di credit card falso. Algun dia pasa a detene un pareha caba cu tabata tin credit card falso den nan poder.
Durante henter e siman aki tabata tin varios keho di algun turista cu tabata riba nos isla y tabata dal negoshinan local abou cu credit card falso, no ta solamente e negoshinan local, pero tambe taxistanan a wordo paga cu papel di 100 dollar falso.
Autoridad tabata tin bista caba riba e grupo aki y algun dia pasa a detene un pareha cu tambe a shop riba nos isla cu credit card falso. Diahuebs den oranan di atardi autoridad a logra pone man riba dos homber mas cu tambe tabata tin credit card falso den nan poder. E dos sospechosonan aki a wordo entrega den man di recherche di Oranjestad.
E dos hombernan aki tabata usa credit card cu no ta pertenece na nan pa paga pa nan estadia na Aruba. Si cualke commerciante por reconoce e dos hombernan aki cu lo por a cumpra algo cerca nan den nan negoshi y a paga cu un credit card lo ta bon pa avisa recherche di Oranjestad, pa asina yuda haya mas evidencia posibel contra e grupo aki.
