Ora nos scucha di casonan di abuso sexual di menor, comunidad ta sinti su mes conmovi. Diferente emocionnan di rabia y tristeza ta bin ariba. Na e momento ey nos no ta pensa racional. Nos ta pensa y reacciona a base di nos emocionnan. Pero e ta importante pa realisa cu e ta un momento crucial, ora cu un mucha bin dilanti cu un caso di abuso sexual. Claro cu nos como adulto ta hay’e dificil pa reacciona na un manera racional, como cu nos kier proteha nos muchanan. Na momento cu un mucha conta cu el a wordo mishi na un manera inapropia, cu of sin penetracion, ta bo deber di raporta esaki inmediatamente na e instancia concerni. Ora un mucha conta bo cu el a pasa den abusa sexual no ta bo responsabilidad pa bay interoga e mucha y puntr’e yen di pregunta di e sucedido. Na momento cu nos reacciona na un manera emocional dilanti di un mucha y ta keda puntr’e yen di pregunta, cu e lo mester bay contesta despues atrobe serca polis, bo por crea miedo y panico serca un mucha pa conta su caso. E ta importante pa ta consciente cu e por ta traumatico pa un mucha conta su storia cada biaha serca un hende nobo y esaki por tin te asta consecuencia pa e continuacion di e investigacion.
Akibou nos ta menciona tres paso pa tuma ora cu un mucha bin dilanti cu un caso:
Paso 1:
- Reconoce e mucha su situacion y sentimiento. Scucha e mucha cuidadosamente. NUNCA entrevista e mucha. Esaki ta un parti hopi fastioso pa keda sin haci, pas obo kier sa exactamente kico a sosode, pero na e momento aki e mucha mester pa bo djis scuch’e. No ta bo trabou pa entrevista e mucha, esaki polis of raadsonderzoekers di Voogdijraad ta haci.
Paso 2:
- Consola e mucha. Record’e cu NO ta su fout cu el a pasa den abuso. Bis’e cu bo ta ker’e y cu bo ta bay yud’e.
Paso 3:
- Despues di a papia cu e mucha, skirbi tur loke el a bisa. NO skirbi of haci anotacion ora e mucha ta presente, haci esaki ora cu e mucha no t’ey. Skirbi te hasta cosnan cu bo a ripara di su comunicacion no verbal. Raporta e caso na Bureau Sostenemi door di yama 588-1010. Si ta desea di denuncia e sospechoso, por haci esaki na Jeugd en Zeden Politie na Warda di Polis Playa. Si e mucha ta bou di 16 aña, e denuncia mester wordo haci door di un mayor of voogd.
Bo tin duda di e caso? Raporta esaki toch na Bureau Sostenemi! E bienestar y siguridad di un mucha of hoben por ta na peliger. Bo no mester ta 100% sigur si e caso ta berdad of no. E ta e responsabilidad di autoridadnan local pa determina e hecho y evidencianan.
Pa mas informacion tocante abuso y negligencia di mucha yama Fundacion Respeta Mi na 582-4433
