Gobierno di coalicion MEP/POR/RED a firma den nan acuerdo di gobernacion di lo percura pa bon gobernacion, transparencia y integridad. Den e espirito aki di mi parti mi ta contento cu bao di e gobernacion aki tur instancia ta haya e oportunidad di por haci nan trabao manera debe ser pa por yuda duna contenido na e acuerdo di gobernacion y den cuadro di esaki entre otro Banco Central ta su deber di haci su control financiero riba inversionistanan y sigur unda cu ta trata di inversionnan hopi grandi. Esaki ta un procedura normal y ainda di parti gobierno mester tambe un screening di parti di Seguridad Nacional (VDA).
Cuestionabel
Un cos si cu mi persona ta cuestiona ta con algo confidencial por bin cay den man di cierto prensa, cu ta crea duda y desconfiansay cu pueblo den su totalidad por ta vulnerabel pa cu su informacion personal un ora pa otro por yega den man di prensa y unda mester por confia cu cerca e instancianan aki confidencialidad ta algo esencial. Pa mi e ta lamentabel si cu algo asina ta crea un mancha sin mester pero sigur tambe ta haci daño na imagen di inversionistanan cu ta dispuesto pa yuda nos economia.
Ta con a haci screening den pasado?
Ami sigur ta orguyoso di Gabinete Wever-Croes cu tin un structura na su lugar pa por screen tur inversionista den cuadro di transparencia. Mi kier pa locual a pasa den pasado no pasa mas, unda ex-Minister di Infrastructura Benny Sevinger ta bisa cu el a google Rincon y tur cos ta mustra bon. Y e mesun procedura di google a ser usa door di Mike de Meza, Mike Eman y Richard Arends y unda awe pa motibo di screening hendenan hinca den acuerdo di CITGO a haya tereno, a traha nan compania y hasta nan propio condominionan, entre nan Rincon, El Pollo Carvahal, Martinez unda cu nan tur ta cera pa motibo di corupcion y cu e tipo di screening y practicanan aki a haci hopi daño na imagen di pais Aruba internacionalmente.
P’esey mi si ta kere den screening y tambe control di parti di instancianan pa garantisa cu pais Aruba su cara no ta pasa berguensa mas pa motibo cu nos ex gobernantenan di AVP ta gusta tene man cu hendenan cu vinculo cu corupcion. Bisa mi cu ken bo ta anda, pa mi bisa bo ken bo ta!