Durante Rueda di Prensa di Gobierno di Aruba, e mandatario encarga cu Asuntonan Social y Labor esta Minister Glenbert Croes, a elabora extensamente riba diferente topico manera e Dia di Famia cu lo wordo celebra riba 5 di Mei na Santa Cruz. Pa e seccion aki, por a conta cu presencia di Pastor Jairo y Sra. Dora Koolman kendenan ambos a duna nan informe riba e importancia di un dia asina.
E otro topico cu e Minister a toca, ta e hecho cu 28 di april proximo mundo henter ta celebra dia Internacional di Siguridad y Salud na pia di trabou. Corectamente manera e mandatario a reiteira: “E ta nos deber nacional pa garantisa siguridad y salud di tur trahado implementando e Ley di ARBO”. E ley aki ta canando su camindanan di consulta y conseho pa finalmente yega Parlamento di Aruba. Ademas di salud y siguridad, e ley aki lo ta un arma balioso cu lo crea mas cupo di trabou specialmente pa nos mediconan gradua den region cu no por eherce nan profesion aki na Aruba.
Despues e mandatario conhuntamente cu Sr. Omar Tromp representando Gremio Comercial, Srs. Diego De Cuba y Hubert Dirksz representando Gremio Sindical a anuncia cu por fin despues di casi 9 luna di preparacion e prome Congreso Nacional Tripartita Social Laboral ta bay tuma luga dialuna 29 di april.
E proceso a tuma su tempo pa motibo di e preparacionnan extenso pa por cumpli cu regla, norma y structura manera prescribi pa ILO esta International Labor Organization. Pa e congreso aki ta conta cu participacion di tur Gremio Comercial y Sindical. Pues un structura cu lo garantisa e balansa efectivo pa sigura exito di e prome congreso Tripartita Social Laboral. Manera Minister Glenbert Croes a expresa, ta su deseo pa esaki bira un plataforma permanente di dialogo unda cu den esfuersonan conhunto por determina e futuro di nos Pais cu ta carga sosten di tur partner.
E dia di Congreso ta reparti como lo siguiente: parti mainta lo trata reglanan di Dialogo Tripartita Social Laboral esta D.T.S.L. como tambe e proyecto di ley ARBO. Merdia lo trata Plan di Trabao di D.T.S.L. pa 2019 segun prioridadnan y puntonan al caso.
Minister Glenbert Croes un biaha mas ta invita tur Organizacion, Sindicato, Prensa, Instancianan pa ta presente y participa sea activamente of como observador, pa hunto nos determina e curso di locual mester ta e
futuro di nos Pais y nos Pueblo.