E di 39 Fiesta Rotaria a bai hopi bon y siman pasa a comparti esaki bek cu comunidad. A recauda un suma di alrededor di 400mil florin cual a reparti bek bou di 21 fundacion.
Rotary Club of Aruba ta organisa tur aña e Fiesta Rotaria cu e meta pa recauda fondo pa asina por continua cu nan servicio comunitario, desaroya proyecto cu tin un impacto positivo den nos comunidad y asisti instancianan cu ta den necesidad. Rotary Club of Aruba tin un comision cu ta selecta e fundacionnan cu ta haya e donacionnan a base di diferente criteria y di e forma aki ta duna bek na comunidad. Dos proyecto cu tur aña ta haya sosten di Rotary Club ta YMCA y Club Kibrahacha y nan ta haya un suma un poco mas grandi cu e otro fundacionnan.
E Fiesta Rotaria di e aña aki a haya bon acogida y un publico basta grandi a atende e evento unda cu nan por a cumpra paña, cuminda y otro artefactonan y productonan y alabes tambe pasa un dia ameno cu nan famia. Alaves por a cumpra ticket pa e grandioso rifa tambe cu a tuma lugar e atardi di Fiesta Rotaria. Rotary Club of Aruba kier a gradici tur su miembronan, Rotaractors, Interactors, boluntarionan y sponsors pa haci Fiesta Rotaria y e rifa un exito un biaha mas. Rotary Club of Aruba ta spera di por conta cu boso sosten atrobe otro aña pa por sigui sirbi comunidad.