ORANJESTAD – Diaranson ultimo, un delegacion di Aruba a reuni cu ehecutivonan di aerolinea Copa Airlines na Panama. Aki a cumpli cu un agenda amplio cu diferente topiconan importante. Topiconan principal cu a bin riba mesa ta capacidad di asiento aereo y desaroyo pa cu esaki y esfuersonan di mercadeo cu ta fomenta turismo for di Latino America cu ta trece 15% di e total di turismo pa Aruba.
E grupo di ehecutivonan di turismo di Aruba a consisti di oficina di Aruba Tourism Authority, CEO Ronella Tjin Asjoe-Croes y Area Director di Latino America Miriam Dabian. For di Aruba Airport Authority tawata presente Chief Commercial Officer Barbara Brown y Air Service Development Manager Jo-Anne Arends. Minister di Turismo Danguillaume Oduber door di otro compromisonan no tabata por ta presente y a uni su mes via ‘video call’ pa asina reitera su compromiso y di Aruba pa cu Copa Airlines. Di parti di Copa Airlines tawata presente Christoph Didier, VP Sales, Gerente Senior di Producto Vacacional Jennifer Janson, Planning Manager Daniel Tapia y Tourism Authorities Coordinator Mercy Correia.
Pa Aruba su turismo, servicio aereo ta fundamental. Pa mantene y incrementa bishitante di nos mercadonan existente y nobo, Aruba ta prioritisa su relacion cu aerolineanan socio y ta fomenta relacionnan nobo unda cu ta necesario. Como tal capacidad aereo ta forma parti integral di e strategia pa incrementa e mercado di turismo procedente di Latino America, cual tambe ta parti integral di Aruba su strategia di diversificacion entre otro.
Compara cu e cifranan te cu october 2017, e situacion cu retonan economico na Venezuela a percura cu te cu october 2018, e mercado aki a baha cu 50% pa loke ta trata bishitantenan Venezolano pa Aruba. Sinembargo, otro mercadonan Latino Americano a mustra un crecemento total di 7% te cu october 2018 compara cu e mesun periodo na 2017. Aki por mira cu Colombia, Brazil, Chile y Peru a hunga un papel importante unda ta mustra crecemento continuo te cu oktober aña pasa, mientras cu Argentina a keda stabil.
Pa loke ta trata transportacion di COPA pa Aruba por mira cu nan a trece 4% mas di bishitante – un total di 31.997 pasahero pa nos isla – te cu october 2018.
Ademas di esaki, e delegacion a revisa varios tema incluyendo capacidad aereo programa pa e aña aki, ahustacion di strategia pa cu e diferente mercadonan, pero tambe aspectonan pa cu reto y oportunidadnan.
-FIN-