ORANJESTAD – Siman pasa den un sala yen di stakeholders na Surfside Marina, Gabinete Wever-Croes por medio di Minister Ruiz-Maduro di Economia a presenta e Maneho Economico Fuerte y Resiliente 2019-2022. Esaki ta pa promer biaha cu Gobierno di Aruba ta presenta un documentacion cu ta contene e maneho economico integral pa stimula e economia di nos Pais. Un parti importante di e maneho ta e presentacion di e 6 sectornan prometedor pa diversificacion di Aruba su economia.
Bou guia di un facilitador internacional sr. Colm Riley di OCO Global, na mei 2018 un workshop a wordo organisa pa empresario na Aruba y den exterior pa asina hunto cu departamento di Gobierno y otro stakeholders, identifica cual ta e sectornan cu Aruba por y mester enfoca riba dje pa por logra diversificacion di nos economia. A base di e recomendacionnan cu a bin dilanti, a formula e sectornan prometedor pa un maneho economico integral den cual ta fomenta un desaroyo sostenibel cu ta cuadra cu e metanan sostenibel pa 2030 manera decreta pa Nacionnan Uni.
E 6 sectornan prometedor ta den Turismo, Economia di Conocemento, Agricultura, Logistica, Economia Circular y Industria Creativo. Cada un sector ta brinda oportunidad pa negoshi. Den sector di turismo ainda tin oportunidad pa turismo di cultura, di sport, di aventura y turismo medico. Den Economia di Conocemento tin oportunidad pa technologia solar y di oceano, educacion avansa den ciencia, technologia, ingeniera y mathematica (STEM) y solucionnan di ICT pa islanan cu por wordo exporta. Na Aruba tin hopi oportunidad ainda pa Agricultura tradicional y moderno haciendo uso di technologia. Den e sector di Logistica tin oportunidad pa servicio maritimo, servicio aereo, servicio portuario y pa warda producto di balor halto den nos wafnan cu ta bon vigila. Pa locual ta e sector di Economia Circular tin oportunidad pa negoshi den material di desperdicio y den recyclahe. E sector di Industria Creativo tin oportunidad pa negoshi chikito y mediano den arte, musica, diseño grafico, fotografia, diseño di website, studio di arte y moda.
Awor cu e sectornan prometedor ta conoci nan ta brinda un caminda concreto pa cana pa por diversifica economia di Aruba. Gobierno den su rol di facilitador lo traha riba incentiva pa cada sector prometedor pa asina logra cu e comerciante cu ta den e ‘driver seat’ por concretisa e negoshinan cu lo diversifica nos economia.