Recientemente a anuncia e yegada di e tugboat Colorado cu a drenta waf di Oranjestad. Despues di 8 aña porfin Aruba tin su propio tugboat. “Como Minister encarga cu APA NV nos a percura pa APA tin tur e toolsnan necesario pa haci nan trabou” e mandatario a expresa. Na momento nos a drenta gobierno nos a mira e necesidad pa Aruba tin su propio tugboat. For di aña 2018 nos a tuma e decision y e proceso pa busca e tugboat Colorado a cuminsa. E inversion den e tugboat aki tabata uno di 14 miyon florin. Un inversion di 14 miyon florin cu tawata necesario pa Aruba por tin su propio tugboat. Esaki ta instrumental pa Aruba su economia y nos turismo.
Gabinete Wever-Croes ta trahando riba diversificacion di e economia di Aruba y den e 6 sectornan prometedor cu a keda fiha pa nos Pais, riba e tereno logistico tin oportunidad pa comercio den servicio maritimo. E inversion cu awor APA ta haci den material basico manera un tugboat, sigur ta yuda Gobierno pa asina facilita e sector prometedor di logistica. Turismo te cu awor ta e weso di lomba di nos economia y e tugboat aki sigur lo yuda na engrandece e turismo crusero.
Finalmente Minister Dangui Oduber a gradici colega Minister Xiomara Maduro pa tur cooperacion brinda den henter e proceso aki. Esaki ta un gobierno cu ta kere firme den nos economia y nos minister di economia ta haciendo lo necesario pa den cooperacion stimula nos economia. Un palabra di gratitud tambe ta bai pa gerencia di APA N.V. y tambe e hunta di comisario.