Home » Parlamentario Marisol Lopez cu preguntanan pa Ministernan Oduber, Oduber y Bikker Informacion riba controlnan di establecimentonan publico ta necesario pa siguridad y higiena di comunidad

Parlamentario Marisol Lopez cu preguntanan pa Ministernan Oduber, Oduber y Bikker Informacion riba controlnan di establecimentonan publico ta necesario pa siguridad y higiena di comunidad

by Admin
0 comment 50 views

 

 

Siman pasa lider di Fraccion di POR den Parlamento, Marisol Lopez-Tromp a manda un serie di pregunta pa Ministernan Otmar Oduber, Andin Bikker y Dangui Oduber relaciona cu e controlnan di establecimentonan publico, specificamente restaurantnan, trucknan di cuminda y supermercadonan.

E parlamentario ta apoya e maneho di e ministernan relaciona cu e controlnan cu ta tumando lugar regularmente cu ta contribui na mehora e calidad di e establecimentonan y e confiansa di comunidad den nos organonan di control y supervision. Pero na mes momento e ta expresa cu e resultado di e controlnan aki ta crea hopi preocupacion y preguntanan pa cu e higiena, calidad y siguridad cu tin na e establecimentonan aki.  

Marisol Lopez-Tromp por a lesa den medionan di comunicacion cu di 40 truck di cuminda cu a wordo controla solamente uno ta cumpli cu tur e rekisitonan necesario, un resultado hopi preocupante.

Teniendo na cuenta e resultadonan aki mas esunnan di e controlnan riba restaurantnan y supermercadonan, líder di Fraccion di POR ta haci e siguiente preguntanan na e mandarionan concerni:

  1. Pa loke ta trucknan di cuminda a constata cu solamente 50% di e trucknan controla tin un instalacion di gas gekeurd. 92% no tin instalacion di  coriente gekeurd y 75% no tin un ‘geldig voertuig keuring’. Minister encarga cu DTI tin algun plan of maneho estableci pa atende cu e situacion preocupante aki?
  2. Di 75 pa 90% di e food trucknan tin puntonan cu mester drecha cu ta relaciona cu e parti di siguridad di e lugar di traha, brandblussers of EHBO kitnan.  Con lo bay atende cu e incumplimento di leynan aki?
  3. Por compronde for di hefe di servicio di Dienst Technische Inspectie (DTI), Anko Koopmans, cu ta purbando di concientisa e doñonan di food trucknan pa responsabilisa nan mes y cu lo bay haci otro investigacion den e proximo 3 lunanan. Esaki lo ta uno mas severo y lo wordo haci conhuntamente cu Departamento di Salud. Con mas severo e investigacion aki lo ta y lo bay tin pasonan corectivo den caso cu constata e mesun iregularidadnan?
  4. Cuanto tempo lo bay duna e food trucknan pa cumpli cu tur e reglanan stipula pa ley?
  5. Lo bay tin boetnan pa esnan cu no cumpli?
    1. Si ta asina ki tipo di boetnan lo wordo duna?
  6. Den caso cu Departamento di Salud constata iregularidadnan, lo cera e trucknan aki?
    1. Si ta asina pa cuanto dia esaki lo wordo cera?
    2. Despues di cuanto tempo lo bolbe controla e establecimentonan cu no a cumpli cu e reglanan di higiene?
  7. Pa loke ta control na supermercado y restaurant, den controlnan realisa a  constata situacionnan cu ta atenta contra salud publico manera bestia y insectonan, entre otro, djaca, musca y cacalaca. Con e diferente departamentonan ta atende cu e casonan aki?
  8. Por constata cu tin establecimentonan cu a wordo cera pa no cumpli cu e leynan estableci na mas cu un ocasion. Con ta atende cu e establecimentonan aki?
    1. Tin un maneho mas estricto pa nan fuera di e 48 ora cu nan ta wordo cera?
    2. Cuanto biaha un establecimento mester wordo cera pa pasonan mas drastico wordo tuma?
    3. Por yega na e punto unda un establecimento ta perde su vergunning? Si ta asina na ki momento?
  9. Establecimentonan na Aruba sa caba cu cada tanto tempo tin control di diferente instancia y por a scucha cu nan ta prepara un par di siman prome cu nan ta spera e bishita di control. Tin un manera cu e controlnan aki por wordo haci na un manera inespera y hasta mas frecuente?
  10. Otro punto importante cu a constata na supermercadonan ta cu nan tin productonan caduca na benta pa clientenan. Esaki ta wordo constata constantemente na cierto supermercadonan. Ki pasonan adicional por tuma pa minimalisa y hasta elimina e fenomeno aki?    
  11. E departamentonan concerni tin suficiente personal pa realisa e controlnan necesario?
    1. Si no ta asina a establece algun maneho pa soluciona esaki?
    2. Y con lihe por haya un solucion?
  12. Tin un manera structural pa informa comunidad riba un base regular cual ta e establecimentonan controla cu ta cumpli y tambe esunnan cu no ta cumpli cu e leynan?

Marisol Lopez-Tromp, a traves di Presidente di Parlamento a pidi e ministernan concerni pa por fabor contesta e preguntanan aki por escrito. E ta spera cu e por haya e respuestanan mas lihe cu

ta posibel teniendo na cuenta e importancia cu esakinan tin pa e siguirdad y higiena di nos comunidad.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio